ემპოლის ზედიზედ მესამე მარცხი - გოგლიჩიძის შეცდომას გოლი მოჰყვა

იტალიის სერია A-ს მე-18 ტურში, საბა გოგლიჩიძის „ემპოლი“ საკუთარ კედლებში „ჯენოას“ დაუპირისპირდა. ტოსკანელებმა ზედიზედ მესამე მარცხი იწვნიეს - ქართველი ფეხბურთელის გუნდი 1:2 დამარცხდა.

პირველ ტაიმში უგოლო ფრე დაფიქსირდა, ანგარიში კი მეორე ტაიმის დასაწყისში გაიხსნა - 46-ე წუთზე გოლი სტუმართა კაპიტანმა, მილან ბადელმა გაიტანა. 54-ე წუთზე ტოსკანელებს წონასწორობის აღდგენის რეალური შანსი მიეცათ, როდესაც „ჯენოას“ კარში 11-მეტრიანი დაინიშნა, თუმცა სებასტიანო ესპოზიტოს ნიკოლა ლეალიმ კუთხე გამოუცნო და პენალტი მოიგერია. 68-ე წუთზე „ჯენოამ“ მეორე გოლი გაიტანა - სწრაფი შეტევა კალებ ეკუბანმა დააგვირგვინა, ასისტი კი ფაბიო მირეტიმ მიითვალა. 75-ე წუთზე სებასტიანო ესპოზიტომ თავისი შეცდომა გამოასწორა და თავური დარტყმით ერთი გოლი გაქვითა.

მატჩის საუკეთესო მომენტები:

რაც შეეხება გოგლიჩიძეს, რობერტო დ’ავერსამ ის ძირითადში ათამაშა და 71-ე წუთზე შეცვალა. სამწუხაროდ, „ჯენოას“ პირველი გოლი სწორედ საბას არადამაჯერებელ თამაშს მოჰყვა, როდესაც ახალგაზრდა ქართველი მცველი ზედიზედ ორჯერ შეცდა. ხშირ შემთხვევაში საბას „ჯენოას“ პორტუგალიელი გარემარბის, ვიტინიას წინააღმდეგ უწევდა თამაში და ქართველმა მცველმა Sofascore-ისგან 6,0-იანი შეფასება მიიღო.

მისი სტატისტიკა ასეთი იყო: ბურთთან 39 შეხება, 1 უხეში შეცდომა, 30-დან 23 ზუსტად შესრულებული პასი (77%), 9-დან 6 ზუსტი გრძელი პასი, 8 დაკარგული ბურთი, 6-დან 4 მოგებული ორთაბრძოლა, 2-დან 2 წაგებული საჰაერო ორთაბრძოლა, ბურთის 3 ამოტანა და 3 ართმევა. გოგლიჩიძე ერთხელ დაჯარიმდა და მეტოქესაც ერთხელ დაარღვევინა წესები.

ცნობისთვის, „ემპოლის“ 19 ქულა აქვს და სატურნირო ცხრილის მე-11 პოზიციას იკავებს. გოგლიჩიძის გუნდი მომდევნო შეხვედრას 4 იანვარს გამართავს, როდესაც „ვენეციას“ ესტუმრება.