მილოცვა ვალენსიასგან - მამარდას სტატია მიუძღვნეს

2024 წელი გიორგი მამარდაშვილის კარიერაში საუკეთესო იყო. როგორც სანაკრებო, ასევე საკლუბო დონეზე არაჩვეულებრივი ასპარეზობა 24 წლის ქართველ მეკარეს სათანადოდ დაუფასდა და გუშინ, საქართველოს ფეხბურთის ფედერაციამ წლის საუკეთესო ფეხბურთელად დაასახელა. აღსანიშნავია, რომ მამარდაშვილი ჩვენი ქვეყნის ისტორიაში აკაკი დევაძის შემდეგ მეორე გოლკიპერია, რომელმაც ეს პრიზი მიიღო. თავისი მეკარისა და ერთ-ერთი ლიდერის აღიარებას ბუნებრივია „ვალენსიას“ ოფიციალური ვებ-გვერდი გამოეხმაურა და პატარა სტატია მიუძღვნა.

რას წერენ მამარდაშვილზე

გიორგი ცოტა ხნის წინ გაზეთ „სარბიელის“ ტრადიციული გამოკითხვის გამარჯვებული გახდა, ახლა კი წლის მთავარი ჯილდო საქართველოს ფეხბურთის ფედერაციისგანაც მიიღო. რაც შეეხება მთელი მსოფლიოს მასშტაბებს - ლევ იაშინის პრესტიჟული პრემიის გამოკითხვაში მეშვიდე ადგილი დაიკავა.

ესპანეთის ლა ლიგის გასულ სეზონში გაშვებული ბურთის გარეშე 13 მატჩი ჩაატარა და საკუთარი რეკორდი გააუმჯობესა. ასევე მან და „ბილბაოელმა“ უნაი სიმონმა ყველაზე მეტი 3-3 პენალტი მოიგერიეს და მარტში 23-წლამდე ასაკის ლა ლიგის საუკეთესო ფეხბურთელის ჯილდოს მოპოვების ერთ-ერთი კანდიდატი გახლდათ.

რაც შეეხება ევროპის ჩემპიონატზე მის გამოსვლას, აბსოლუტურად ყველა მატჩში დამაჯერებელი იყო, ჩეხებთან შეხვედრაში კი MVP-ის ჯილდოც მიიღო.

შეგახსენებთ, რომ ამჟამად გიორგი მამარდაშვილი ტრავმას მკურნალობას და მოასწრებს თუ არა მადრიდის „რეალთან“ მატჩისთვის გამოჯანმრთელებას, რომელიც 3 იანვარს გაიმართება, ჯერჯერობით უცნობია.