„სხვა დროს არ შეეძლო მოსვლა?“ | უმარის მწვრთნელი მერაბის PI-ში არ შეშვებაზე

უმარ ნურმაგომედოვის ლეგენდარული მწვრთნელი, ხავიერ მენდესი მერაბ დვალიშვილის ვიდეოს გამოეხმაურა, რომელშიც „მანქანა“ ამბობს, რომ UFC PI-ში არ შეუშვეს, რადგან იქ უმარი ვარჯიშობდა. მენდესის თქმით, დვალიშვილი მომხდარზე არ უნდა გაბრაზებულიყო და თუ ვინმეა დამნაშავე, ეს UFC-ია.

„UFC PI-ში კონკრეტული საათიდან კონკრეტულ საათამდე ვართ და რატომ არ შეეძლო, მერაბს სხვა დროს მოსვლა? მაინტერესებს, როდის ითხოვა UFC PI-ში შესვლის ნებართვა და როდის მოგვცეს ჩვენ ამის უფლება. თუ UFC-იმ კონკრეტული საათები შეგვირჩია სავარჯიშოდ და მერაბი მოდის და ამბობს, რომ ვარჯიში უნდა, რაღაც რიგზე ვერაა, რადგან იმ მომენტში, უმარი და ისლამი ვარჯიშობენ. ამაზე რატომ გაბრაზდა? ეს UFC-ის ბრალია და არა ჩვენი“.

შეგახსენებთ, რომ დვალიშვილისა და ნურმაგომედოვის საჩემპიონო ბრძოლა თბილისის დროით, 19 იანვარს, UFC 311-ზე გაიმართება. MMA-ში დვალიშვილის რეკორდი 18 გამარჯვება და 4 მარცხია, უმარ ნურმაგომედოვს კი 18 ბრძოლიდან ყველა მოგებული აქვს და ამ დრომდე დაუმარცხებელია.

UFC PI-ის რაც შეეხება, ეს ორგანიზაციის საკუთრებაში არსებული შენობაა, რომელშიც მებრძოლებს წონასთან დაკავშირებულ საკითხებსა და ვარჯიშში ეხმარებიან, მათ ჯანმრთელობაზე ზრუნავენ და თანამედროვე ტექნოლოგიებსა და საჭიროების შემთხვევაში, ფსიქოლოგიურ დახმარებას სთავაზობენ.