თაგვები ოლდ ტრაფორდზე | მანჩესტერ იუნაიტედის ახალი პრობლემა

„მანჩესტერ იუნაიტედს“ პრობლემები არ ელევა. Daily Mail-ის ინფორმაციით, „წითელი ეშმაკები“ ახალი გამოწვევის წინაშე დადგნენ და მათ საშინაო არენაზე, თაგვების შემოსევაა, რის გამოც, კლუბის ხელმძღვანელებს ზომების მიღება მოუწიათ.

ბრიტანული გამოცემის ცნობით, სისუფთავის კონტროლის ინსპექტორებმა, ბოლო შემოწმებისას, „ოცნებათა თეატრზე“ თაგვის ფეკალიები აღმოაჩინეს. ეს მოხდა იმ დახლებთან ახლოს, სადაც გულშემატკივრებისთვის საკვები იყიდება. შედეგად, „იუნაიტედის“ სურსათის ჰიგიენა 5-დან 2 ვარსკვლავით შეფასდა, როცა პრემიერ ლიგის კლუბების უმრავლესობას 5 და 4 ვარსკვლავი აქვთ მინიჭებული.

Daily Mail-ის ინფორმაციით, „მანჩესტერ იუნაიტედმა“ აღნიშნულ საკითხზე მუშაობა უკვე დაიწყო და მავნებლების კონტროლზე მომუშავე კომპანიებს დაუკავშირდა. კლუბი აპირებს, პრობლემა უსწრაფეს დროში აღმოფხვრას. Daily Mail-ის მიხედვით, თაგვების პრობლემა სტადიონის ადგილმდებარეობას უკავშირდება. „ოლდ ტრაფორდი“ ბრიჯუოთერის არხსა და რკინიგზის ხაზს შორის მდებარეობს.

საინტერესოა, რომ „წითელი ეშმაკები“ მსგავსი გამოწვევის წინაშე ადრეც დამდგარან. 2015 წელს, მღრღნელები კლუბში დასაქმებული ადამიანების ოფისებსიც შეუნიშნავთ. Daily Mail-ის მიხედვით, მავნებლების კონტროლის წარმომადგენელი კომპანიები, პრობლემის აღმოსაფხვრელად, „ოლდ ტრაფორდს“ კვირაში 4-5-ჯერ ესტუმრებიან.