ერთი შეხებით შეასრულა | გაგუას გოლი ხორვატიაში

ხორვატიის ჩემპიონატის მე-18 ტურში, გიორგი გაგუას „ისტრა“ „ოსიეკს“ დაუპირისპირდა. ქართველი ფეხბურთელის გუნდი სამი ქულის აღებასთან ახლოს იყო და 2:0-ს იგებდა, თუმცა, უპირატესობა ვერ შეინარჩუნა და მატჩი ფრედ, 2:2 დასრულდა.

გაგუამ ძირითად შემადგენლობაში დაიწყო და საკუთარ გუნდში ერთ-ერთი საუკეთესო იყო. 59-ე წუთზე, ქართველმა შემტევმა მეტოქის საჯარიმოში შესანიშნავად ითამაშა და ანგარიში 2:0 გახადა, თუმცა, 64-ე და 66-ე წუთებზე, „ოსიეკმა“ ჩამორჩენა აღმოფხვრა.

„ოდნავ იმედგაცრუებული ვარ. როცა 2:0-ს იგებ და 2-წუთიან ინტერვალში 2 გოლს უშვებ, განწყობა გინადგურდება. ეს ჩვენთვის გაკვეთილია და ცოდნა უნდა მივიღოთ. უნდა მივხვდეთ, რომ აუცილებელია მთელი მატჩი აქტიურები ვიყოთ და არა მხოლოდ 88 ან 85 წუთის განმავლობაში. ვფიქრობ, პროგრესის გზაზე ვართ, მაგრამ ეს კვირა ოდნავ რთული იყო, რადგან მწვრთნელი შეგვეცვალა“, - განაცხადა ქართველმა ფეხბურთელმა მატჩის შემდეგ.

ცნობისთვის, „ისტრას“ 19 ქულა აქვს და სატურნირო ცხრილის მე-7 პოზიციას იკავებს. გაგუას გუნდის მომდევნო მეტოქე „დინამო ზაგრებია“, რომელსაც 25 იანვარს დაუპირისპირდება.