15 წლის ქართველი ფეხბურთელი Football Talent Scout-ის ყურადღების ცენტრში მოექცა

Football Talent Scout-ი საფეხბურთო გვერდია, რომლის მფლობელიც იაჩეკ კულიგია და იგი საკუთარ მკითხველს პერსპექტიულ ახალგაზრდა ფეხბურთელებს აცნობს. ამჯერად, მისი ყურადღების ცენტრში „დინამო თბილისის“ აკადემიის წარმომადგენელი, ანდრია ბართიშვილი მოექცა, რომელიც რამდენიმე დღის წინ, იტალიურ კლუბს დაუკავშირეს.

„ანდრია ბართიშვილი დინამო თბილისის აკადემიის წარმომადგენელია. აკადემიისა, რომელიც ისეთი ცნობილი ტალანტების აღზრდითაა ცნობილი, როგორებიც გიორგი მამარდაშვილი, ხვიჩა კვარაცხელია, გიორგი ჩაკვეტაძე, ირაკლი აზაროვი, გაბრიელ სიგუა, ზურიკო დავითაშვილი და სხვები არიან. ანდრია 18-წლამდე ასაკის იმ თაობის წარმომადგენელია, რომელშიც საბა ხარებაშვილი, ვახტანგ სალია, ლუკა წულაია, გიორგი გვასალია, მათე შათირიშვილი, ნიკოლოზ ელისაშვილი და ნიკოლოზ ჩიქოვანი შედიან. ის ახალგაზრდული ნაკრებების რეგულარული წევრია და 17-წლამდე გუნდის ერთ-ერთი ლიდერია.

ძლიერი მხარეები: სისწრაფე (ძალიან ძლიერია), აჩქარება (ძალიან ძლიერია), ტექნიკა (ძალიან ძლიერია), ბურთის კონტროლი (ძალიან ძლიერია), დრიბლინგი (ძალიან ძლიერია), მოქნილობა (ძალიან ძლიერია), გამბედაობა (ძალიან ძლიერია), პირველი შეხება (ძლიერია), კრეატიულობა (ძლიერია), მოძრაობის უნარი (ძლიერია), უნივერსალურობა (ძლიერია), სტანდარტულები (ძლიერია).

რაში აქვს მოსამატებელი: ფიზიკურობის მხრივ დიდი სამუშაო აქვს გასაწევი; როგორც პატარა ასაკის შემტევების უმრავლესობას, მეტოქის მესამედში, გადაწყვეტილების მიღების პროცესისა და ეფექტურობის მხრივ, დიდი პროგრესის მიღწევა შეუძლია.

სათამაშო სტილი: თვალისმომჭრელი სტილის გარემარბი. ფლეიმეიქერისთვის საჭირო უნარები აქვს და მესამე ნახევარში, საშუალოზე მაღალი ფლეიმეიქერული უნარებითა და კრეატიულობით გამოირჩევა. სუპერ მოქნილია, ტემპსა და მიმართულებას სწრაფად ცვლის. ელვისებური სისწრაფე და აჩქარება. დრიბლინგი უყვარს. მოსწონს, როცა თავისუფლება აქვს და ტაქტიკურად შეზღუდული არაა. საოცარი დრიბლიორია და ბურთს ფუტსალის მოთამაშის მსგავსად აკონტროლებს. შეუძლია, განსხვავება ნებისმიერ მომენტში შექმნას. მაღალ სიჩქარეზე ბურთს ფანტასტიკურად აკონტროლებს. არაპროგნოზირებადია და მოკლე სივრცეებში საოცრად მოქმედებს. კონტრშეტევებზე სახიფათოა. კარგი პირველი შეხება აქვს და კედლის გათამაშება შეუძლია. სტანდარტულების განხორციელება გამოსდის“, - წერს Football Talent Scout-ი.

ცნობისთვის, ბართიშვილი 15 წლისაა და საქართველოს 17-წლამდე ნაკრებში თამაშობს, მიმდინარე წელს გამართულ ევროპის ჩემპიონატის საკვალიფიკაციო ეტაპზე სამ მატჩში 2 გოლი გაიტანა და 1 საგოლე პასი შეასრულა.