„კვარაცხელიას თამაში შეუძლია“ | ანტონიო კონტეს პრესკონფერენცია

„ნაპოლის“ მთავარმა მწვრთნელმა, ანტონიო კონტემ მატჩისწინა პრესკონფერენცია გამართა. „პარტენოპეის“ მომდევნო შეხვედრა „ჯენოასთან“ ელის და იტალიელმა სპეციალისტმა ხვიჩა კვარაცხელიას ჯანმრთელობის მდგომარეობაზეც ისაუბრა.

„16 ტურის შემდეგ, 35 ქულა ბევრია. ეს ნიშნავს, რომ ჩვენი მოსვლიდან დღემდე, გუნდს დიდი წინსვლა აქვს. ბიჭებს ყველა ასპექტში რომ არ მოემატებინათ, ახლა აქ არ ვიქნებოდით. მათი მჯერა. ყოველთვის ვერ გაიმარჯვებ, მაგრამ წარუმატებლობას ისინი ხედავენ როგორც შანსს, რომ კონკრეტული კომპონენტი გააუმჯობესონ. გუნდით ბედნიერი ვარ. ყველა ფეხბურთელი საქმეშია ჩართული, ენთუზიაზმი იგრძნობა და ეს ყველაფერი ხსნის იმას, რომ 35 ქულა გვაქვს.

როგორ გრძნობს თავს ხვიჩა? გუშინ ჩვენთან ერთად ვარჯიში დაიწყო, დღეს კი უკეთ გამოიყურებოდა. გუნდთან ერთად წამოვა და გვითხრა, რომ სათამაშოდ მზადაა. მისი გამოჯანმრთელება ჩვენთვის ძალიან მნიშვნელოვანია.

ჯენოასთან სტუმრად თამაში მარტივი არასდროსაა. ინგლისური სტილის სტადიონი, რომელზეც ტრიბუნები მინდორთან ძალიან ახლოსაა. გულმხურვალე გულშემატკივრობა და საოცარი ატმოსფერო, თუმცა, ჩვენი თამაში უნდა ვითამაშოთ, საკუთარი მაქსიმუმი წარმოვაჩინოთ და მოედანზე გადავიტანოთ ის, რაზეც გასული კვირის განმავლობაში ვმუშაობდით. საუბარი მაქვს გუნდურობასა და თანაგუნდელების დახმარებაზე. უდინეზესთან მატჩში, შემთხვევითი გოლი მივიღეთ და ანგარიშში მეტოქეს ჩამოვრჩით, თუმცა, დავამტკიცეთ, რომ დარტყმის მიღება და ფეხზე წამოდგომა შეგვიძლია“.

შეგახსენებთ, რომ „ნაპოლის“ 16 ტურის შემდეგ, 35 ქულა აქვს და სატურნირო ცხრილის მეორე პოზიციას იკავებს. „პარტენოპეი“ ლიდერ „ატალანტას“ 2 ქულით ჩამორჩება და „ჯენოას“ 21 დეკემბერს, თბილისის დროით, 19:00-ზე დაუპირისპირდება.