ბითაძის მე-18 ორმაგი დუბლი! ორლანდო ოკლაჰომასთან დამარცხდა

გამთენიისას NBA-ში მორიგი ტურის შეხვედრები გაიმართა. გოგა ბითაძის „ორლანდო“ შინ „ოკლაჰომასთან“ 99:105 დამარცხდა.

მორიგი კარგი შეხვედრა ჩაატარა გოგა ბითაძემ, რომელმაც ლიგაში უკვე მე-18 ორმაგი დუბლი შეასრულა. ამჯერად, ქართველმა ცენტრმა 27:13 წუთი ითამაშა, 15 ქულა ჩააგდო, რასაც 10 მოხსნა, 3 შედეგიანი გადაცემა და 2 დაფარება დაუმატა. ჯამში 8-დან 6 ორქულიანი და 4-დან 3 საჯარიმო გამოიყენა.

აღსანიშნავია, რომ NBA-ში ეს 150-ე ქართული ორმაგი დუბლი იყო. ისტორიაში პირველი ორმაგი დუბლის ავტორი 1999 წელს ვლადიმერ სტეფანია გახდა.

შეხვედრის MVP „ოკლაჰომას“ ვარსკვლავი შაი გილჯეს-ალექსანდერი გახდა, რომელმაც 35 ქულა, 4 მოხსნა და 6 გადაცემა გაიფორმა.

ბითაძის გუნდი ლიგაში 17 მოგებითა და 12 მარცხით აღმოსავლეთ კონფერენციის მე-4 ადგილზე იმყოფება. მათი მომდევნო მეტოქე 22 დეკემბერს „მაიამი ჰიტი“ იქნება.