პოლ პოგბას ძმას 3-წლიანი პატიმრობა მიუსაჯეს
გვინეის ნაკრების ყოფილ ფეხბურთელს, მატიას პოგბას 3-წლიანი პატიმრობა მიუსაჯეს. მას ბრალად ედება საკუთარი ძმის - პოლ პოგბას გატაცებაში მონაწილეობა და ფულის გამოძალვა.
საქმის განხილვა პარიზში 26 ნოემბრიდან იმართებოდა. L'Équipe-ს ინფორმაციით, მატიასისთვის მისჯილი 3 წლიდან 2 პირობითია. ის სასჯელს შინაპატიმრობაში მოიხდის და ელექტრონული მეთვალყურეობის ქვეშ იქნება.
გავრცელებული ინფორმაციით, მატიასის ადვოკატმა განაცხადა, რომ განაჩენს სააპელაციო სასამართლოში გაასაჩივრებს.
რაც შეეხება შანტაჟში მონაწილე კიდევ 5 პირს, სასამართლომ მათ 1-დან 8 წლამდე პატიმრობა და ჯარიმა დააკისრა.
შეგახსენებთ, რომ პოლ პოგბას გატაცება 2022 წლის გაზაფხულზე მოხდა. 2 შეიარაღებული მამაკაცი მას დაემუქრა და 13 მილიონი ევროს გადახდა მოითხოვა.
