„ქართველი მაესტრო“ | საფეხბურთო ექსპერტი ჩაკვეტაძეს აქებს

ინგლისური ფეხბურთის ექსპერტმა, ალი მაქსუელმა გიორგი ჩაკვეტაძეზე ისაუბრა. მაქსუელი „უოტფორდისა“ და „ვესტ ბრომვიჩის“ შეხვედრას გამოეხმაურა, რომელიც „კრაზანებმა“ 2:1 მოიგეს და ქართველი ნახევარმცველი შეაქო.

„ჩაკვეტაძე უბრალოდ დაუჯერებელია. ის ქართველი მაესტროა და მისი თამაშის ყურება დიდი სიამოვნებაა. უოტფორდის პირველი გოლისას, მას ასისტი არ გაუკეთებია და არც თავად გაუტანია, მაგრამ მომენტი მისი წყალობით შეიქმნა. ჩაკვემ ბურთი მიიღო, მეურვე ჩამოიშორა და მეტოქე გუნდის 4 მცველს აიძულა, მასზე გადასულიყვნენ. ვესტ ბრომვიჩის უკანახაზელებს სხვა გზა არ ჰქონდათ, რადგან ჩაკვეტაძე ძალიან კარგი ფეხბურთელია“.

როგორც მოგეხსენებათ, „უოტფორდი“ ჩემპიონშიფის სატურნირო ცხრილის მე-7 ადგილს იკავებს და „კრაზანების“ მიზანი პრემიერ ლიგაში დაწინაურებაა, თუმცა, შესაძლოა, იანვარში, ერთ-ერთი ლიდერის გარეშე დარჩნენ. ახლახან, ბრიტანულ პრესაში დაიწერა, რომ ჩაკვეტაძის გადაბირებაზე „ევერტონი“, „ვულვზი“ და „ლესტერი“ ფიქრობენ.

ცნობისთვის, ინგლისის რანგით მეორე დივიზიონის მიმდინარე სეზონში, მოედანზე 600-ზე მეტი ფეხბურთელი გასულა. ჩაკვეტაძე ერთადერთია, რომელმაც 40-ზე მეტი სახიფათო მომენტი შექმნა და ამავდროულად, 40-ზე მეტი წარმატებული დრიბლინგი განახორციელა.