FIFA THE BEST - ცნობილია სანიოლის და კაშიას არჩევანი

დასრულდა 2024 წლის FIFA THE BEST-ის დაჯილდოება, სადაც სხვადასხვა ნომინაციებში გამარჯვებულები გამოვლინდნენ.

მადრიდის რეალის სუპერვარსკვლავი ვინისიუს ჟუნიორი წლის საუკეთესო ფეხბურთელად დასახელდა. შეგახსენებთ, რომ ბრაზილიელს ოქროს ბურთის გამარჯვებულადაც მოიაზრებდნენ, მაგრამ აღნიშნული ჯილდო როდრიმ დაისაკუთრა.

ნომინანტებს ხმებს სხვადასხვა ქვეყნების ეროვნული ნაკრებების მწვრთნელები, კაპიტნები და ჟურნალისტები აძლევდნენ. რა თქმა უნდა, გამოკითხვაში მონაწილეობა გურამ კაშიამ და ვილი სანიოლმაც მიიღეს.

გურამ კაშიას ხმები ასე გადანაწილდა: 1) როდრი 2) ვინისიუსი 3) იამალი
ვილი სანიოლის ხმები: 1) როდრი 2) ვინისიუსი 3) ტონი კროოსი

აქვე გეტყვით, რომ ვინისიუს ჟუნიორმა მეორე ადგილზე გასულ როდრის სულ რაღაც 5 ქულით აჯობა. ბრაზილიელმა 48 ქულა მიიღო, ხოლო ესპანელმა ნახევარმცველმა 43.

ცნობისთვის, ვინი გახდა მეექვსე ბრაზილიელი რომარიოს, რონალდოს, რივალდოს, რონალდინიოს და კაკას შემდეგ, ვინც აღნიშნული ჯილდო მოიგო.