გველესიანი: მინდა მოვიბოდიშო, ჩემმა გაძევებამ შედეგზე გავლენა მოახდინა

ირანის პრო ლიგაში მე-12 ტურის ცენტრალური შეხვედრა გაიმართა, სადაც „სეპაჰანმა“ გიორგი გველესიანის „პერსეპოლისს“ უმასპინძლა და 2:1 დაამარცხა.

მატჩი დაძაბული და საინტერესო გამოდგა. პირველ ტაიმში ანგარიში 1:1 იყო, როცა 39-ე წუთზე არბიტრმა გველესიანს წითელი ბარათი უჩვენა, რაც შეხვედრაში გადამწყვეტი გამოდგა.

მეორე ნახევარში 71-ე წუთზე მასპინძლებმა გამარჯვების მომტანი ბურთის გატანა შეძლეს და სამი ქულაც გაიფორმეს, რის შემდეგაც „პერსეპოლისთან“ სხვაობა 4 ქულამდე გაზარდეს. გველესიანის გუნდი 23 ქულით მესამე ადგილზე იმყოფება.

მატჩი გამორჩეული კიდევ ერთი ფაქტის გამო იყო. შეხვედრას 75 ათასი გულშემატკივარი ესწრებოდა და ირანული ფეხბურთის ისტორიაში პირველად, ტრიბუნებზე მხოლოდ ქალები და ბავშვები იყვნენ.

გველესიანმა მატჩის შემდეგ, სოციალურ ქსელში პოსტი გამოაქვეყნა, სადაც გუნდსა და ქომაგებს მოუბოდიშა.

„პერსეპოლისის ძვირფასო ოჯახო, მინდა ბოდიში მოვიხადო გაძევებისთვის, რამაც მატჩის საბოლოო შედეგზე გავლენა მოახდინა (არ აქვს მნიშვნელობა სამართლიანი იყო თუ არა). თქვენ კარგად მიცნობთ, ერთად ბევრი რამ გამოვიარეთ, გვქონდა შესანიშნავი დღეები და მძიმე დროც, რომელიც ყოველთვის ჩვენთვის სასიკეთოდ მთავრდება. გპირდებით, რომ ახალ დაუნდობელ პერსეპოლისს იხილავთ! მინდა ჩემ თანაგუნდელებს ბოდიში მოვუხადო იმ ყოველი დამატებითი მეტრისთვის, რომლებმაც ღირსეული თამაშის ჩვენება და მომენტების შექმნა შეძლეს.

მინდა მხარდაჭერა გამოვუცხადო ჩვენს სამწვრთნელო შტაბს, რომლებიც ძალისხმევას არ იშურებენ იმისათვის, რომ გუნდი წინ წავიდეს.

დღეს, ირანული ფეხბურთის ისტორიაში უპრეცედენტო შემთხვევა იყო. 75 000-იანი სტადიონი თითქმის სავსე გახლდათ და ტრიბუნებზე მხოლოდ ქალები და ბავშვები იყვნენ. მინდა მადლობა გადავუხადო ქალბატონებს, რომლებმაც საოცარი ატმოსფერო შექმნეს“.

გველესიანმა მიმდინარე სეზონში „პერესპოლისის“ რიგებში ჩემპიონატისა და აზიის ჩემპიონთა ლიგის მატჩებში ჯამში 17-ჯერ ითამაშა და 2 გოლის გატანა შეძლო.