თელავმა და გაგრამ კრისტალბეთ ეროვნულ ლიგაში ადგილები შეინარჩუნეს

კრისტალბეთ ეროვნულ ლიგაში პლეი-ოფის საპასუხო შეხვედრები გაიმართა და მომდევნო სეზონისთვის ეროვნულ ლიგაში მოთამაშე ორივე გუნდის ვინაობა გაირკვა.

პირველი მატჩი რუსთავის ტექნიკურ ცენტრზე ჩატარდა, სადაც რუსთავმა თელავს უმასპინძლა. პირველი მატჩი თელაველებმა მინიმალური სხვაობით, 2:1 მოიგეს, დღევანდელი შეხვედრა კი რუსთავმა წარმატებით დაიწყო და პირველ ნახევარში, მე-12 წუთზე იუტა ნაკანოს გოლით დაწინაურდნენ.

დარჩენილ დროში არაფერი შეცვლილა და გამარჯვებულის გამოსავლენად დამატებითი ტაიმები დაინიშნა. 116-ე წუთზე, თელავმა ტატო ჟივიძის გოლით წონასწორობა აღადგინა, რითაც თავის გუნდს ეროვნულ ლიგაში ადგილი შეუნარჩუნა. შესაბამისად, თელავმა ორი მატჩის ჯამში 2:1 გაიმარჯვა.

პლეი-ოფის მეორე მატჩი თბილისში, დავით პეტრიაშვილის სახელობის სტადიონზე ჩატარდა, სადაც გაგრა ბოლნისის სიონს დაუპირისპირდა. გუნდებს შორის პირველი მატჩი ფრედ, 1:1 დასრულდა, მეორე შეხვედრა კი 2:2.

მე-5 წუთზე გაგრა უმძიმეს მდგომარეობაში აღმოჩნდა. მთავარმა მსაჯმა უხეშობის გამო მოედნიდან თორნიკე გეგეჭკორი გააძევა და გაგრელებს ფაქტობრივად მთელი მატჩის განმავლობაში 10 კაცით თამაში მოუწიათ. ამის მიუხედავად, მასპინძლებმა მეტოქეს მაინც ღირსეული წინააღმდეგობა გაუწიეს და თამაში პენალტების სერიამდე მიიყვანეს.

ანგარიში პირველი ტაიმის მიწურულს გიორგი რეხვიაშვილმა გახსნა და სიონი დააწინაურა. გაგრამ წონასწორობა 52-ე წუთზე, გიორგი ქიმაძის გოლით აღადგინა. მატჩის ძირითადი დრო ფრედ, 1:1 დასრულდა.

დამატებით ტაიმებში გუნდებმა ერთმანეთის კარში თითო-თითო გოლი გაცვალეს. 94-ე წუთზე გოჩა ცირდავამ სიონი კიდევ ერთხელ დააწინაურა, 104-ე წუთზე კი გაგრამ ლუკა ნოზაძის ავტოგოლით ანგარიში კიდევ ერთხელ გაათანაბრა. დარჩენილ დროში არაფერი შეცვლილა და გამარჯვებულის გამოსავლენად პენალტების სერია დაინიშნა.

მატჩის ძირითადი დროის მსგავსად, პენალტების სერიაც საკმაოდ დაძაბული გამოდგა, გამარჯვება კი გაგრამ მოიპოვა. საგულისხმოა, რომ გუნდებმა ერთმანეთის კარში 8-8 დარტყმა შეასრულეს, საბოლოო ანგარიში კი გაგრას სასარგებლოდ 7:6 დაფიქსირდა.

შესაბამისად, თელავმა და გაგრამ კრისტალბეთ ეროვნულ ლიგაში ადგილები შეინარჩუნეს და მომავალი სეზონიდან კვლავ საქართველოს მთავარ ჩემპიონატში იასპარეზებენ. ასევე შეგახსენებთ, რომ 2025 წლის სეზონიდან კრისტალბეთ ეროვნულ ლიგაში გარეჯიც იასპარეზებს.