სტარტი ორი საშინაო მატჩით - შესარჩევის კალენდარი ცნობილია

2026 წლის მსოფლიოს ჩემპიონატის შესარჩევ ეტაპს საქართველოს ფეხბურთელთა ეროვნული გუნდი 2025 წლის 4 სექტემბერს თურქეთის ნაკრებთან საშინაო მატჩით დაიწყებს, რასაც სამი დღის შემდეგ ასევე სახლში ბულგარელებთან თამაში მოყვება, შესარჩევ ეტაპს კი ქართველი ფეხბურთელები ბალკანელებთან საგარეო თამაშით დაასრულებენ. კალენდარი ჯგუფის მონაწილე თითოეული ქვეყნის ნაკრებების ხელმძღვანელებთან და ტურნირის ორგანიზატორებთან მოთათბირების შემდეგ დადგინდა.

ოქტომბერში ვილი სანიოლის მომზადებული ორ მატჩს გამართავს - 11 რიცხვში სტუმრად ესპანეთი-ნიდერლანდების წყვილის გამარჯვებულს დაუპირისპირდება, ხოლო 14-ში გასვლაზე თურქებთან ითამაშებს. შესარჩევი ეტაპის ბოლოსწინა ტურში, 15 ნოემბერს საქართველოში ესპანელები, ან ნიდერლანდელები ჩამოვლენ, შეჯიბრებას კი როგორც უკვე გითხარით, ბულგარეთის ნაკრებთან საგარეო შეხვედრით დავასრულებთ.

შეგახსენებთ, რომ მუნდიალის საგზურს პირდაპირ ჯგუფის გამარჯვებული მიიღებს, მეორე ადგილზე გასული გუნდი კი მსოფლიოს ჩემპიონატზე მოხვედრას პლეი ოფის გზით შეეცდება.

კალენდარი

4 სექტემბერი: საქართველო - თურქეთი

7 სექტემბერი: საქართველო - ბულგარეთი

11 ოქტომბერი: ესპანეთი/ნიდერლანდები - საქართველო

14 ოქტომბერი: თურქეთი - საქართველო

15 ნოემბერი: საქართველო - ესპანეთი/ნიდერლანდები

18 ნოემბერი: ბულგარეთი - საქართველო