მამუს უქულო მატჩი - სპურსმა პორტლენდი დაამარცხა

NBA-ს მიმდინარე გათამაშებაში „სან ანტონიომ“ მეცამეტე გამარჯვება მოიპოვა, სანდრო მამუკელაშვილმა კი პარკეტზე მხოლოდ 12 წუთი გაატარა და შეხვედრა უქულოდ დაამთავრა. „სპურსმა“ სტუმრად „პორტლენდს“ 2-ქულიანი სხვაობით, 118:116 მოუგო და სატურნირო მდგომარეობა ოდნავ გაიუმჯობესა. 25 წლის ქართველმა კალათბურთელმა 5 მოხსნა დააგროვა, საიდანაც სამი დაცვაში, ორი კი თავდასხმაში ასპარეზობისას შეასრულა.

მატჩის ყველაზე შედეგიანი მოთამაშე 32 ქულით, 4 მოხსნითა და 2 შედეგიანი გადაცემით „პორტლენდის“ კალათბურთელი ჯერამი გრანტი გახდა. „სან ანტონიოს“ რიგებში კი, ისევე როგორც ლამის მიმდინარე სეზონის ყველა შეხვედრაში, ამჯერადაც ვიქტორ ვემბანიამა გამოირჩეოდა, რომელმაც საჯარიმოები ასპროცენტიანი სიზუსტით (ათიდან ათი) ჩააგდო, ცამეტიდან ექვსი ორქულიანი და ექვსიდან ორი სამქულიანი გამოიყენა, რის შედეგადაც 28 ქულა, 7 მოხსნა და 7 ასისტი დააგროვა.

25 თამაშის შემდეგ 13 მოგებითა და 12 წაგებით „სპურსი“ დასავლეთ კონფერენციის სატურნირო ცხრილში მეათე ადგილზეა. მამუკელაშვილი და მისი თანაგუნდელები მომდევნო მატჩს 16 დეკემბერს, „მინესოტასთან“ გამართავენ.