„ალბათ ყველაზე რთულ ჯგუფში მოვხვდით“ | თურქეთის ნაკრების თავკაცის კომენტარი

თურქეთის საფეხბურთო ნაკრების მთავარი მწვრთნელი, ვინჩენცო მონტელა მსოფლიო ჩემპიონატის საკვალიფიკაციო ეტაპის წილისყრის შედეგებს გამოეხმაურა. მონტელას გუნდის ერთ-ერთი მეტოქე საქართველოა და იტალიელმა სპეციალისტმა განაცხადა, რომ თურქეთი ძალიან რთულ ჯგუფში მოხვდა.

„ალბათ, ყველაზე რთულ ჯგუფში მოვხვდით, მაგრამ ნებისმიერი მეტოქისთვის მზად ვართ. ესპანეთი მოქმედი ევროპის ჩემპიონია. მე-3 კალათში მყოფი გუნდებიდან საქართველო ერთ-ერთი ყველაზე რთული მეტოქეა, ბულგარეთს კი მეოთხე კალათაში მყოფ ნაკრებებს შორის, ფიფა-ს რეიტინგში ყველაზე მაღალი ადგილი უკავია.

თავის გასამართლებელ მიზეზებს არ ვეძებთ და კარგ გუნდებთან თამაში ჩვენს ფეხბურთელებს დამატებით მოტივაციას მისცემს. ახალგაზრდა და მაღალი დონის გუნდი ვართ და ვფიქრობ, ასეთ მატჩებში მონაწილეობა ბიჭებს წინსვლაში დაეხმარება. მზად ვართ და გვინდა, პირველ ადგილზე გავიდეთ. თუ ეს არ გამოვიდა, ჩვენი მიზანია, მეორე პოზიცია დავიკავოთ და პლეიოფში მოვხვდეთ“.

შეგახსენებთ, რომ მსოფლიო ჩემპიონატის საგზურს ჯგუფების გამარჯვებულები მიიღებენ, მეორეადგილოსნები კი, ბრძოლას პლეი-ოფში გააგრძელებენ. E ჯგუფის მონაწილეებისთვის საკვალიფიკაციო ეტაპი 2025 წლის სექტემბერში დაიწყება.