რის გამო გადაწყვიტა დივიზიონის შეცვლა | რას ამბობს ილიას მწვრთნელი

ილია თოფურიას მწვრთნელმა, ხორხე კლიმენტმა მიზეზებზე ისაუბრა, რომელთა გამოც, „ელ მატადორი“ ქვემსუბუქი წონითი დივიზიონის დატოვებაზე ფიქრობს. კლიმენტმა მთავარ პრობლემად წონის კლება დაასახელა და განაცხადა, რომ ილიას საჩემპიონო წონის დაფიქსირება უჭირს.

„მთავარი პრობლემა ისაა, რომ ილიას წონის კლების პროცესი ეზიზღება. ბევრჯერ დაუკლია და ყოველ ჯერზე, უფრო და უფრო რთულია. ამის გაკეთება აღარ უნდა და სურს, მსუბუქ წონით დივიზიონში ავიდეს, რადგან თვლის, რომ ეს მისთვის საუკეთესო ვარიანტია.

დასაწყისში, ილია სუპერ მსუბუქ წონაში ჩხუბობდა. ასაკის მატებასთან ერთად, შენი ორგანიზმი იცვლება. 20 წლის ასაკში ერთი ორგანიზმი გაქვს, 25 წლის ასაკში - მეორე, 30 წლის ასაკში - მესამე. კუნთოვანი მასა იმატებს და წონის კლება რთულია. ზოგჯერ, თოფურია 85 კილოგრამს იწონის და 66-მდე უნდა ჩამოვიდეს, რაც ძალიან დიდი რიცხვია.

თოფურიას მსუბუქ წონაში გადასვლის შემთხვევაში, ქამარი ვაკანტური გახდება და არ ვიცი, რა მოხდება. არ მგონია, ილიამ საჩემპიონო ქამარი დაიცვას და წონის შეცვლა აქვს გადაწყვეტილი“.

შეგახსენებთ, რომ 27 ოქტომბერს, ილია თოფურიამ მაქს ჰოლოუეის აბუ-დაბიში, UFC 308-ზე დაუპირისპირდა და მე-3 რაუნდში გათიშა. ეს იყო პირველი შეხვედრა, როცა ქართველმა ქამარი დაიცვა.