„მერაბი საჩემპიონო ქამარს არცხვენს“ | მახაჩევმა დვალიშვილზე ისაუბრა

UFC-ის მსუბუქი წონითი დივიზიონის ჩემპიონმა, ისლამ მახაჩევმა უმარ ნურმაგომედოვისა და მერაბ დვალიშვილის ჩხუბზე ისაუბრა. მახაჩევმა განაცხადა, რომ „მანქანა“ საჩემპიონო ქამარს არცხვენს და უმარი ტიტულის ერთადერთი რეალური პრეტენდენტია.

„უმარმა თქვა, რომ მერაბი მასთან მივიდა და ჰკითხა: „რატომ იჩენ ჩემ მიმართ უპატივცემულობას?“ რეალურად, უმარს მერაბის მისამართით უპატივცემულობა არ გამოუჩენია. პირიქით იყო, დვალიშვილმა გამოიჩინა უპატივცემულობა.

მერაბმა იცის, რომ უმარი საჩემპიონო ქამრის ერთადერთი რეალური პრეტენდენტია. მან ეს დაიმსახურა, დვალიშვილი კი პიოტრ იანსა და დეივისონ ფიგერედოს იწვევს. შონ ომალისაც მიმართა, რომელსაც ტრავმა აქვს და ჩხუბი არ შეუძლია. მერაბი უმარს არასდროს ახსენებს. ის საჩემპიონო ქამარს არცხვენს და მეცოდება, მაგრამ ბედნიერი ვარ, რომ როგორც იქნა, კონტრაქტს ხელი მოაწერა. დვალიშვილი და ნურმაგომედოვი მაგარ ჩხუბს გამართავენ“.

შეგახსენებთ, რომ მერაბისა და უმარის დაპირისპირება UFC 311-ზე გაიმართება, რომლის მთავარი მოვლენაც ისლამ მახაჩევისა და არმან ცარუკიანის ორთაბრძოლა გახლავთ. UFC 311-ს თბილისის დროით, 19 იანვარს ვიხილავთ.