„მსოფლიოში საუკეთესო მთავარი მწვრთნელი გვყავს“ | პსჟ-ში ენრიკესი სჯერათ
„პარი სენ-ჟერმენის“ პრეზიდენტი, ნასერ ალ-ხელაიფი გამოეხმაურა ინფორმაციას, თითქოს კლუბი ახალი მთავარი მწვრთნელის ძიებაშია. ალ-ხელაიფიმ ლუის ენრიკეს სრული ნდობა გამოუცხადა და აღნიშნა, რომ ის მსოფლიოში საუკეთესო სპეციალისტია.
„ლუის ენრიკე ჩვენთან დარჩება. გრძელვადიანი პროექტი გვაქვს და მან ეს ძალიან კარგად იცის. ენრიკე მაღალი დონის მთავარი მწვრთნელია. პარი სენ-ჟერმენს მსოფლიოში საუკეთესო მთავარი მწვრთნელი ჰყავს.
ზალცბურგთან გამართულმა შეხვედრამ კლუბის ყველა გულშემატკივარს იმედი დაუბრუნა. ფეხბურთში, თუ გოლს ვერ იტან, სერიოზული პრობლემები გექმნება, მაგრამ ჩვენს შესაძლებლობებში ყოველთვის დარწმუნებული ვიყავი და მჯერა, წარმატებას მივაღწევთ“.
შეგახსენებთ, რომ ენრიკეს კლუბთან კონტრაქტი 2027 წლის ზაფხულამდე აკავშირებს. ბოლოდროინდელი წარუმატებლობისა და 3-მატჩიანი მოუგებელი სერიის შემდეგ, დაიწერა, რომ პარიზული გრანდი მის გაშვებას აპირებდა, მაგრამ როგორც ჩანს, ეს ინფორმაცია სიმართლეს არ შეესაბამება.
