პირველი ადგილი დღის ტოპ 10 მომენტში | NBA-იმ ბითაძის ჩატენვა გამოარჩია

NBA-ის ოფიციალურმა იუთუბ არხმა დღის საუკეთესო მომენტების ტოპ 10 გამოაქვეყნა. ქართველი გულშემატკივრებისთვის საინტერესო ისაა, რომ პირველ ადგილს მათი ფავორიტი იკავებს და ნაციონალურმა საკალათბურთო ასოციაციამ გოგა ბითაძე გამოარჩია.

გამთენიისას, ქართველი ცენტრის გუნდი, „ორლანდო მეჯიქი“ „მილუოკი ბაქსს“ დაუპირისპირდა და 109:114 დამარცხდა. გოგამ ძირითად შემადგენლობაში დაიწყო და 38 წუთი ითამაშა, მეორე მეოთხედში კი ძალიან მაგარი მომენტი შემოგვთავაზა. ბითაძემ იანის ანტეტოკუნმპო არ შეიმჩნია და ბერძენ სუპერვარსკვლავს გადაატენა, რაც ტოპ 10-ის პირველ ადგილზე მოსახვედრად საკმარისი აღმოჩნდა.

ცნობისთვის, გოგამ ორმაგი დუბლი გაიფორმა, რაც ზედიზედ მეორე შეხვედრაში გააკეთა - 12 ქულა, 14 მოხსნა, 4 შედეგიანი გადაცემა, 1 ჩაჭრა, 1 დაფარება. ქართველმა ცენტრმა 13-დან 6 ბურთი ჩააგდო, 5 მოხსნა მეტოქის ფარზე ჰქონდა და წესები 5-ჯერ დაარღვია.

გეტყვით იმასაც, რომ „მეჯიქის“ ანგარიშზე 17 მოგება და 10 წაგებაა. „ორლანდო“ აღმოსავლეთ კონფერენციაში მესამე გახლავთ და მომდევნო თამაში 20 დეკემბერს, საკუთარ კედლებში, „ოკლაჰომა სითი თანდერის“ წინააღმდეგ ელის.