უცნაურ ვარიანტს განიხილავს | შესაძლოა, წიტაიშვილი ესპანეთიდან წავიდეს

ბულგარული Gol-ის ცნობით, სოფიის ცსკა-მ ზამთრის სატრანსფერი ფანჯრისას შესაძლოა გიორგი წიტაიშვილი დაიმატოს. ფეხბურთელის მხარემ ბულგარული კლუბისგან წიტაიშვილთან დაკავშირებით ინფორმაცია მოითხოვა. სავარაუდოდ, ის პირობები უნდა იგულისხმებოდეს, რასაც ცსკა ქართველ შემტევს სთავაზობს.

როგორც ვიგებთ, ტრანსფერით ფეხბურთელის წარმომადგენელი დაინტერესებულია, თუმცა 24 წლის ასაკში დიდი საფეხბურთო ქვეყნიდან გაცილებით დაბალი დონის ჩემპიონატში გადასვლა ფეხბურთელის მომავლისთვის კარგი ვარიანტი არ უნდა იყოს. მით უმეტეს, რომ ცსკა ევროტურნირებზე არ თამაშობს და ბულგარეთის ჩემპიონატში მე-8 ადგილზეა. ასე რომ თუ ესპანეთს დატოვებს, სადაც თავი სწრაფად დაიმკვიდრა, სუფთა საფეხბურთო კუთხით არასწორ არჩევანს გააკეთებს. ამ ფაქტორებიდან გამომდინარე აღნიშნული ინფორმაცია რბილად რომ ვთქვათ უცნაურია.

საქართველოს ეროვნული ნაკრების 24 წლის ფეხბურთელს კიევის „დინამოსთან’’ კონტრაქტი 2026 წლის ზაფხულამდე აკავშირებს, ერთწლიანი იჯარით „გრანადაში'' თამაშობს. წიტაიშვილმა ლა ლიგა 2-ის მიმდინარე სეზონში 14 მატჩში (12 სასტარტოში) 1 გოლი გაიტანა და 1 საგოლე პასი შეასრულა. ასევე, ესპანეთის თასზე 2 მატჩი ჩაატარა.

გასულ წლებში წიტაიშვილი ცნობილ უკრაინულ სამენეჯერო კომპანია ProStar-თან თანამშრომლობდა, თუმცა შემდეგ მათთან თანამშრომლობა შეწყვიტა. ამჟამად, Carp Football Management-თან თანამშრომლობს, ამ სააგენტოსთან დაკავშირებულნი არიან მამუკა ჯუღელი და კრისტიან ძაკარდო. ზაფხულში, როცა წიტაიშვილი „გრანადაში’’ გადავიდა, ფეხბურთელთან ერთად ძაკარდო იმყოფებოდა, ტრანსფერი იტალიელის ჩართულობით განხორციელდა.