„UFC-ს სტადიონები არ უყვარს“ - იჩხუბებს თუ არა თოფურია სანტიაგო ბერნაბეუზე

UFC-ის ქვემსუბუქი წონითი დივიზიონის ჩემპიონმა, ილია თოფურიამ არაერთხელ განაცხადა, რომ სურს, UFC ესპანეთში ჩაიყვანოს და „სანტიაგო ბერნაბეუზე“ იჩხუბოს.

თუმცა ქართველმა მებრძოლმა El Cafelito-სთან ინტერვიუში განაცხადა, რომ ეს არც ისე მარტივი ამოცანაა.

რა თქვა თოფურიამ:

„ჩვენ ამ თემაზე მადრიდის „რეალს“ ველაპარაკეთ, მაგრამ ეს ძალიან ჩახლართული საკითხია. მესმის UFC-სიც, რადგან მათ არ უყვართ ღონისძიებების სტადიონზე ჩატარება - მათ უნდათ, რომ გულშემატკივრების შთაბეჭდილებებზე იზრუნონ“.

„ამბობენ, თუ ადამიანები ზედა იარუსებზე დასხდებიან, იქიდან მებრძოლები ჭიანჭველებივით გამოჩნდებიან და ამით სიამოვნებას ვერ მიიღებ. ვცდილობ მათ ავუხსნა, რომ „ბერნაბეუ“ სხვებისგან განსხვავდება და ეს სტადიონი სწორედ მსგავსი ღონისძიებებისთვის მზად არის“.

შეგახსენებთ, რომ 27 ოქტომბერს, ილია თოფურიამ მაქს ჰოლოუეის აბუ-დაბიში, UFC 308-ზე დაუპირისპირდა და მე-3 რაუნდში გათიშა.

ეს იყო პირველი შეხვედრა, როცა UFC-ში ქართველმა ქამარი დაიცვა.