ნამდვილი იდიოტია - ვან დერ ვაარტმა იბრაჰიმოვიჩი გალანძღა

ბოლო პერიოდში რაფაელ ვან დერ ვაარტი საკმაოდ აქტიურია და როგორც თანამედროვე ფეხბურთის შესახებ, ასევე თავის ყოფილ თანაგუნდელებზე საკმაოდ საინტერესო კომენტარებს აკეთებს. თავდაპირველად ვეტერანმა ნიდერლანდელმა ფეხბურთელმა ყურადღება კრიშტიანუ რონალდუს გაკრიტიკებით მიიქცია, როდესაც აღნიშნა, რომ „რეალს“ 6-ბურთიანი სხვაობით რომც მოეგო, გოლს თავად თუ არ გაიტანდა, პორტუგალიელი ვარსკვლავი მუდამ ცუდ ხასიათზე იყო.

ამჯერად ვან დერ ვაარტმა უკვე ზლატან იბრაჰიმოვიჩზე ისაუბრა და შვედს ნამდვილი იდიოტი უწოდა. ნიდერლანდელმა ნახევარმცველმა გაიხსენა შვედეთი-ნიდერლანდების თამაში, როდესაც ზლატანმა მას ტრავმა მიაყენა და ეს მიუხედავად იმისა, რომ „აიაქსში“ თანაკლუბელები იყვნენ. მისი თქმით, მათ შორის მაშინ ურთიერთობა იმდენად დაიძაბა, რომ ამსტერდამულ გუნდში ან ერთი უნდა დარჩენილიყო, ან მეორე. საბოლოოდ კი, იბრას შეთავაზებით „იუვენტუსმა“ მიმართა და მისმა ტურინში გადაბარგებამ ვან დერ ვაარტს „აიაქსის“ დატოვება გადააფიქრებინა.

შეგახსენებთ, რომ ვან დერ ვაარტი და იბრაჰიმოვიჩი „აიაქსში“ 2000-იანი წლების დასაწყისში თამაშობდნენ და გუნდთან ერთად როგორც ქვეყნის ჩემპიონატი, ასევე თასი მოიგეს.