“თამაში ცუდად დავიწყეთ“ - ფლიკმა ბეტისთან ფრე შეაფასა

ლა ლიგის მორიგ ტურში ბარსელონა ბეტისს ესტუმრა და ქულები დაკარგა. მატჩი ფრედ 2:2 დასრულდა.

შეხვედრის შემდეგ, კატალონიელთა მთავარმა მწვრთნელმა ჰანსი ფლიკმა ჟურნალისტებთან ისაუბრა.

რა თქვა ფლიკმა?

„თამაში პირველივე წუთიდან ცუდად დავიწყეთ. ცვლილებები? საჭირო იყო, რადგან გაცილებით მეტ სისწრაფეს ვითხოვდი. პლუს ამას, ოთხშაბათს ჩემპიონთა ლიგაზე მნიშვნელოვანი თამაში გველის. მსაჯთან კონფლიქტი? მე არავისთვის არაფერი მითქვამს. ეს უბრალოდ ჩემი რეაქცია იყო. დიდი დრო დასჭირდა გადაწყვეტილების მისაღებად და ასეთ დროს გარკვეული ეჭვი არსებობს.  რა თქმა უნდა, ამით არ ვამაყობ. ასეთი რამ არასდროს მომსვლია.

მსაჯებზე მეტი საუბარი არ მსურს. კარგი თამაში არ იყო და ეს უკვე ვთქვი. ახალგაზრდა გუნდი ვართ და გაუმჯობესება გვჭირდება. გაცილებით ძლიერები უნდა ვიყოთ განსაკუთრებით მაშინ, როცა სტუმრად ვთამაშობთ. ხარისხი გვაქვს, მაგრამ ეს ყველა თამაშში უნდა ვაჩვენოთ. შეგვეძლო უკეთ გვეთამაშა, მაგრამ პასების დროს ნელები ვიყავით.“

შეგახსენებთ, რომ მადრიდის რეალმა თავისი მატჩი მოიგო და ბარსელონასთან სხვაობა 1-ქულამდე შეამცირა, თუმცა სამეფო კლუბს ერთი მატჩით ნაკლები აქვს ჩატარებული და გამარჯვების შემთხვევაში ლა ლიგას სწორედ ანჩელოტის გუნდი ჩაუდგება სათავეში.