„ძალიან ძლიერი ფეხბურთელია“ | რა თქვა ვალტერ მაცარის ასისტენტმა კვარაზე
„ნაპოლის“ ყოფილი მთავარი მწვრთნელის, ვალტერ მაცარის ასისტენტმა, ნიკოლო ფრუსტალუპიმ ხვიჩა კვარაცხელიაზე ისაუბრა. Kiss Kiss Napoli-ისთვის მიცემულ ინტერვიუში, ფრუსტალუპიმ „კვარა“ შეაქო და განაცხადა, რომ თანამედროვე ფეხბურთში, მისნაირი მოთამაშეები სულ უფრო და უფრო ცოტანი რჩებიან.
„ნაპოლიში ძალიან ცოტა დრო გავატარეთ. სულ რაღაც სამი თვე ვიმუშავეთ და აფრიკის თასი დაგვემთხვა, რომლის გამოც ოსიმენი და ზამბო-ანგისა გამოგვაკლდნენ. რთული სეზონი იყო და როგორც პრეზიდენტმა განაცხადა, სატრანსფერო ფანჯრისას სწორი გარიგებები არ განხორციელებულა.
ხვიჩა კვარაცხელია ძალიან ძლიერი ფეხბურთელია. მაცარიმ, გუნდში მოსვლისთანავე, მასზე გააკეთა აქცენტი და იმ მოკლე პერიოდის განმავლობაში, როცა ნეაპოლში ვმუშაობდით, კვარა იმ მცირე ფეხბურთელთა შორის იყო, რომლებიც კარგად თამაშობდნენ. კვარაცხელიას მეტოქის მოტყუება შეუძლია და თანამედროვე ფეხბურთში, მისნაირ მოთამაშეებს უფრო და უფრო ცოტას ვხედავთ“.
შეგახსენებთ, რომ ვალტერ მაცარი „ნაპოლის“ თავკაცის პოსტზე 2023 წლის ნოემბერში დაინიშნა და გუნდში თებერვლამდე დარჩა. იგი ფრანჩესკო კალცონამ ჩაანაცვლა და საბოლოოდ, „პარტენოპეი“ ანტონიო კონტემ ჩაიბარა.
