„შესანიშნავი თამაში ჰქონდა“ - კონტე კვარასა და ტორინოსთან მოგებაზე

იტალიის სერია A-ს მე-14 ტურში, „ნაპოლი“ სტუმრად „ტორინოს“ დაუპირისპირდა და მინიმალური სხვაობით, 1:0 დაამარცხა.

ერთადერთი გოლი 31-ე წუთზე სკოტ მაკტომინეიმ გაიტანა, შოტლანდიელ ნახევარმცველს საგოლე გადაცემა კი ხვიჩა კვარაცხელიამ გაუკეთა.

შეხვედრის დასრულების შემდეგ „ნაპოლის“ მთავარმა მწვრთნელმა, ანტონიო კონტემ განვლილი მატჩი შეაფასა და ხვიჩა კვარაცხელიას თამაშზეც ისაუბრა.

რა თქვა კონტემ:

„რომასთან“ მატჩისგან განსხვავებით, დღეს სრულიად განსხვავებული გუნდი ვნახე, ეს იმის დამსახურებაცაა, რომ ბევრი ვიშრომეთ. მნიშვნელოვანია, რომ გუნდი როგორც ინდივიდუალურად, ისე გუნდურადაც იზრდება. ყოველთვის ვამბობდი, რომ რაღაც ასპექტებში განვითარება გვჭირდებოდა და მიხარია, რომ დღეისთვის ამ შედეგს მივაღწიეთ. დღეს შეგვეძლო, რომ უფრო დიდი ანგარიშითაც მოგვეგო, მაგრამ სტეფან-სავიჩის დიდებულმა თამაშმა ანგარიში 1:0 დატოვა. ბიჭებისგან დღეს დავინახე, რომ ყოველთვის აქვთ გაუმჯობესებისა და რაღაც განსაკუთრებულის გაკეთების სურვილი“.

„რაც შეეხება კვარაცხელიას, მას შესანიშნავი თამაში ჰქონდა, მომეწონა მოედანზე როგორც უტევდა, ასე იყო „რომას“ წინააღმდეგაც. რასაც ჩვენ ვაკეთებთ, ამას შეუძლია მას სარგებელი მოუტანოს პერსონალურ დონეზეც. თუ ყველაფერს სწორი გზით გავაკეთებთ, მაშინ ეს როგორც მისთვის, ისე ყველასთვის სასარგებლო იქნება“.

ცნობისთვის, მიმდინარე სეზონში, ხვიჩამ სერია A-ში მე-14 მატჩი ჩაატარა. მის ანგარიშზე 5 გოლი და 3 საგოლე გადაცემაა. „ნაპოლი“ იტალიის ჩემპიონატის სატურნირო ცხრილში 32 ქულით კვლავ ერთპიროვნული ლიდერია. „პარტენოპეი“ მომდევნო შეხვედრას 8 დეკემბერს, საკუთარ მოედანზე „ლაციოს“ წინააღმდეგ გამართავს.