„მისმა აგენტმა პარი სენ-ჟერმენთან კონტაქტი განაახლა“ | RAI კვარას მომავალზე

ხვიჩა კვარაცხელიას მომავალი იტალიური პრესის მთავარი სასაუბრო თემაა. პოპულარული სატელევიზიო არხის, RAI Sport-ის ინფორმაციით, ქართველი გარემარბის გადაბირების სავარაუდო კანდიდატთა შორის „პარი სენ-ჟერმენიც“ დაბრუნდა.

RAI Sport-ის მიხედვით, „კვარას“ აგენტმა, მამუკა ჯუღელმა პარიზული კლუბის ხელმძღვანელებთან კონტაქტი განაახლა. „ნაპოლის“ ფეხბურთელს „პარტენოპეისგან“ ახალი ხელშეკრულება ჯერ არ მიუღია და ადგილსამყოფლის შეცვლას არ გამორიცხავს.

როგორც მოგეხსენებათ, „პარი სენ-ჟერმენის“ გარდა, კვარაცხელია კიდევ ორი გრანდის რადარზე იმყოფება. იტალიური და ესპანური გამოცემების ცნობით, მის გადაბირებაზე „ბარსელონა“ და „მანჩესტერ იუნაიტედი“ ფიქრობენ. „ბლაუგრანა“ მზადაა, „კვარას“ სანაცვლოდ 80 მილიონი ევრო გაიღოს, „წითელი ეშმაკები“ 100-მილიონიან შეთავაზებასაც განიხილავენ.

ცნობისთვის, კვარაცხელიას „ნაპოლისთან“ კონტრაქტი 2027 წლის ივნისამდე აკავშირებს. Transfermarkt-ზე მისი ღირებულება 80 მილიონი ევროა და ჯუღელს სურს, განახლებულ ხელშეკრულებაში, გამოსასყიდ პუნქტში, სწორედ ეს თანხა ჩაიწეროს, რაზეც „პარტენოპეი“ უარს აცხადებს. ნეაპოლელთა მიზანი 100 მილიონი ევროს დაფიქსირებაა.