წასვლასთან უფრო ახლოს არის - სალაჰისთვის არაფერი შეუთავაზებიათ

„ლივერპული“ – „რეალის“ გუშინდელი თამაში იმ გამონაკლისთა კატეგორიას მიეკუთვნებოდა, რომელიც მოჰამედ სალაჰმა შედეგიანი მოქმედების გარეშე დაამთავრა. არადა, ეგვიპტელი გატანასთან ახლოს იყო, მაგრამ 70-ე წუთზე თავისივე მოპოვებული 11-მეტრიანი ააცილა. მიმდინარე სეზონში ყველა ტურნირზე გამართულ 19 მატჩში 31 წლის აფრიკელის ანგარიშზე 12 გოლთან ერთად, 10 საგოლე პასია და გუშინდელის ჩათვლით იყო მხოლოდ სამი მატჩი (რეალთან, ნოტინგემთან და კრისტალთან), რომელშიც მას თავი არც გოლით და არც საგოლე პასით არ გამოუჩენია.

ახლა ყველაზე მთავარი გახლავთ ის, გაახანგრძლივებს თუ არა მოჰამედ სალაჰი „ლივერპულთან“ 2025 წლის 30 ივნისამდე მოქმედ კონტრაქტს, რაზეც ფეხბურთელმა მედიის ერთ-ერთ წარმომადგენელს ორაზროვანი პასუხი გასცა. მისი თქმით, ახალი ხელშეკრულების გაფორმება არც მისთვის და არც მის აგენტ რამი აბასისთვის ამ დრომდე არავისთვის შეუთავაზებია, რის გამოც სინანულით აღნიშნა, რომ წასვლასთან უფრო ახლოს არის, ვიდრე დარჩენასთან. თუმცა, ისიც დაამატა, რომ გადაწყვეტილია არაფერია და მოვლენების განვითარებას უნდა დაველოდოთ.

„ლივერპულის“ ხელმძღვანელები მოქმედებენ შემდეგი პრინციპით, რომ 30 წელს გადაცილებულ ფეხბურთელებთან გრძელვადიანი კონტრაქტების გაფორმება არ ხდება და ისინი არ აპირებენ სალაჰის შემთხვევაში გამონაკლისი დაუშვან. ეგვიპტელის მსგავსად, კლუბთან ხელშეკრულება ამ სეზონის ბოლოს უსრულდებათ ვირჯილ ვან დაიკსა და ტრენტ ალექსანდერ-არნოლდს, თუმცა მათ შემთხვევაში მოლაპარაკებები უფრო წარმატებით მიმდინარეობს. ამ თემასთან დაკავშირებით საკუთარი მოსაზრება CBS-ის ეთერში ჯეიმი კარაგერმა გამოთქვა და იმედი დაიტოვა, რომ ფეხბურთელისა და გუნდის წარმომადგენლები ოქროს შუალედს იპოვიან და ყველაფერი ხელშესახები შედეგებით დასრულდება.

სალაჰი ამ დროისთვის 167 გოლით ინგლისის პრემიერ ლიგის ყველა დროის ბომბარდირთა დავაში 167 გოლით მერვე ადგილზეა და ასე თუ განაგრძო, წლევანდელ სეზონში ტიერი ანრისა (175) და ფრენკ ლამპარდის (177) დაწევის არაჩვეულებრივი შანსი ექნება. სერხიო აგუეროსა (184) და ენდი კოულის (187) მიღწევების გამეორება კი დარჩენის შემთხვევაში, სავარაუდოდ მიზნად მომავალი სეზონისთვის უნდა დაისახოს.