„მწვრთნელებს უნდა დავუმტკიცო, რომ შეუძლიათ, მენდონ“ - მამუკელაშვილი

„სან ანტონიო სპურსის“ ქართველმა კალათბურთელმა, სანდრო მამუკელაშვილმა „იუტასთან“ მოგებული მატჩის შემდეგ მედიასთან კომენტარი გააკეთა.

რა თქვა მამუკელაშვილმა:

„სამწვრთნელო შტაბი დაცვაში თამაშისას მეტის გაკეთებას გვთხოვს. პირადად მე ყველას უნდა დავუმტკიცო, რომ დაცვაში თამაში შემიძლია. ყოველ ჯერზე ვცდილობ, რაც შეიძლება სოლიდურად ვითამაშო და არ გავიმეორო შეცდომები. ჩემი მიზანია, ვაჩვენო სამწვრთნელო შტაბს, რომ მათ შეუძლიათ, მენდონ“. 

შეგახსენებთ, რომ მამუკელაშვილმა „იუტასთან“ მატჩი 9 ქულით, 2 მოხსნითა და 1 ჩაჭრით დაასრულა. სანდრომ 4-დან 4 ბურთი ჩააგდო, რომელთაგან 1 სამქულიანი იყო, და ორი ეფექტური ჩატენვაც შემოგვთავაზა. „სან ანტონიომ“ მეტოქე 128:115 დაამარცხა.

ცნობისთვის, ტექსასელთა ანგარიშზე 10 მოგება და 8 წაგებაა. „სპურსი“ დასავლეთ კონფერენციის მე-10 ადგილს იკავებს და მისი მომდევნო მეტოქე „ლოს ანჯელეს ლეიკერსი“ გახლავთ, რომელსაც 28 ნოემბერს დაუპირისპირდება.