კეინის მეშვიდე ჰეთ-თრიკი - ინგლისელმა ჰოლანდს აჯობა

გუშინ, გერმანიის ბუნდესლიგის მეთერთმეტე ტურის გახსნით შეხვედრაში „ბაიერნმა“ საკუთარ სტადიონზე „აუგსბურგი“ (3:0) დიდი ანგარიშით დაამარცხა. „ალიანს არენაზე“ გამართული მატჩი კი ჰარი კეინის ბენეფისად იქცა, რომელმაც ჰეთ-თრიქი შეასრულა და მატჩის საუკეთესო ფეხბურთელად დასახელდა, თუმცა ინგლისელი ფორვარდისთვის ეს ჩვეულებრივი თამაში არ ყოფილა.

კეინს გერმანიის ჩემპიონატში უკვე 50 გოლი დაუგროვდა და მან ამის გაკეთება რეკორდულად მცირე რაოდენობის, 43 მატჩში მოახერხა. ამ მხრივ აქამდე გამორჩეული ერლინგ ჰოლანდი გახლდათ, რომელსაც მსგავს ნიშნულამდე მიღწევისთვის, „დორტმუნდში“ ასპარეზობის დროს, შვიდით მეტი, 50 შეხვედრის ჩატარება დასჭირდა. აქვე გეტყვით, რომ ბუნდესლიგაში კეინისთვის ეს რიგით მე-7 ჰეთ-თრიკი გახლდათ, ხოლო მიმდინარე სეზონში როგორც საკლუბო, ასევე სანაკრებო დონეზე ჩატარებულ 22 მატჩში მის ანგარიშზე 23 გოლი და 9 შედეგიანი გადაცემაა.

გერმანიის მიმდინარე ჩემპიონატის ბომბარდირთა დავაში გუშინდელი ბენეფისის შემდეგ, ინგლისელი თავდამსხმელი 14 გოლით ერთპიროვნულად გალიდერდა და ფრანკფურტის „აინტრახტის“ ეგვიპტელ ფორვარდს ომარ მარმუშს 3 ბურთით გაუსწრო. მომდევნო შეხვედრას ის და მისი თანაგუნდელები უკვე სამშაბათს, ჩემპიონთა ლიგაში „ალიანს არენაზე“ პსჟ-სთან გამართავენ.