„ოქროს ბურთი ხუთჯერ უნდა მოეგო“ - ბუფონი ნეიმარზე
ტურინის „იუვენტუსისა“ და იტალიის ნაკრების ლეგენდა, ჯანლუიჯი ბუფონი მიიჩნევს, რომ ნეიმარს ოქროს ბურთი ხუთჯერ უნდა მოეგო. ამის შესახებ ბუფონმა Corriere della Sera-სთან ინტერვიუში განაცხადა, როდესაც უპასუხა კითხვას, ვინ იყო ყველაზე ძლიერი ფეხბურთელი, ვის წინააღმდეგაც მას უთამაშია.
რა თქვა ბუფონმა:
„არჩევანის გაკეთება რთულია, იმიტომ რომ ფეხბურთელების სამი თაობის წინააღმდეგ მაქვს ნათამაშები. ზიდანი, რონალდო, მესი, კრიშტიანუ, ინიესტა...
ერთის არჩევას მთხოვთ? მაშინ, ნეიმარი. იმის გათვალისწინებით, თუ როგორი ფეხბურთელი და როგორი ადამიანია, ნეიმარს ოქროს ბურთი ხუთჯერ უნდა მოეგო“.
შეგახსენებთ, რომ ბუფონსა და ნეიმარს ერთად „პარი-სენ ჟერმენში“ უთამაშიათ, ეს 2018-2019 წლების სეზონში მოხდა.
აქვე გეტყვით, რომ ყველაზე ახლოს ოქროს ბურთის მოგებასთან ნეიმარი 2015 და 2017 წლებში იყო, როდესაც გამოკითხვაში მესამე ადგილი დაიკავა - ორივეჯერ მასზე მაღლა მხოლოდ ლიონელ მესი და კრიშტიანუ აღმოჩნდნენ.
ცნობისთვის, 2023 წლიდან ნეიმარი „ალ-ჰილალის“ ღირსებას იცავს, თუმცა ტრავმების გამო საუდის არაბეთის ერთ-ერთი ყველაზე ტიტულოვანი კლუბის მაისურით მხოლოდ 7 მატჩი ჩაატარა და 1 გოლი გაიტანა.
