„ფანტასტიკურ კალათბურთს თამაშობს“ | ორლანდოს მთავარი მწვრთნელი გოგაზე

„ორლანდო მეჯიქის“ მთავარმა მწვრთნელმა, ჯამალ მოზლიმ „ფინიქს სანსთან“ გამართულ შეხვედრაზე ისაუბრა, რომელიც გოგა ბითაძემ ფენომენალურად ჩაატარა. მოზლის საკადრო პრობლემებზე ჰკითხეს და ფლორიდელთა დამრიგებელმა ქართველი ცენტრი შეაქო.

„გუნდისთვის მნიშვნელოვანია, როცა ერთიანობას ვიჩენთ და პრობლემების მიუხედავად, ვაგრძელებთ იმას, რასაც ვაკეთებდით. მო ვაგნერი შესანიშნავია. გოგა ბითაძე ფანტასტიკურ კალათბურთს თამაშობს, ჯონათან აიზეკი კი პასუხისმგებლობას იღებს და მატჩებს 5 ნომერზე ამთავრებს“.

შეგახსენებთ, რომ ქართველმა ცენტრმა მიმდინარე რეგულარულში მეოთხე ორმაგი დუბლი გაიფორმა და 17 ქულა, 10 მოხსნა, 2 დაფარება და 1 შედეგიანი გადაცემა დააგროვა. ბითაძემ „ორლანდოს“ მაისურით 17 ქულა პირველად ჩააგდო და 8 სროლიდან მხოლოდ ერთი ბურთი გააფუჭა (8-დან 7 ორქულიანი), 4-დან კი 3 საჯარიმო სროლა გამოიყენა.

გეტყვით იმასაც, რომ „ორლანდოს“ 9 მოგება და 6 წაგება აქვს და აღმოსავლეთ კონფერენციაში მე-3 ადგილზე იმყოფება. „მეჯიქმა“ ზედიზედ 6 თამაში მოიგო და მეტოქეს 100 ქულაზე მეტის დაგროვების უფლება არც ერთ შეხვედრაში მისცა. ფლორიდელთა მომდევნო მოწინააღმდეგე „ლოს ანჯელეს კლიპერსია“, რომელსაც 21 ნოემბერს დაუპირისპირდება.