სერია A-ს საუკეთესო ფეხბურთელები 2024 წელს | Whoscored-ის რეიტინგში კვარა პირველია

Whoscored-მა ფეხბურთის ქართველი გულშემატკივრებისთვის საინტერესო მონაცემები გამოაქვეყნა. ცნობილმა სტატისტიკურმა პორტალმა დაასახელა სერია A-ში მოასპარეზე ფეხბურთელები, რომლებსაც 2024 წელს (იგულისხმება კალენდარული წელი და არა მიმდინარე სეზონი), საუკეთესო შეფასება აქვთ.

პირველ ადგილს ხვიჩა კვარაცხელია იკავებს. „ნაპოლის“ 23 წლის გარემარბის საშუალო შეფასება 7.46 გახლავთ. მეორე პოზიციაზე რაფაელ ლეაუ იმყოფება (7.42). მესამე ადგილზე ადემოლა ლუკმანს ვხედავთ (7.38), მეოთხეზე მარკუს ტურამია (7.28), ხოლო მეხუთე შარლ დე კეტელარე გახლავთ (7.25).

სერია A-ს მიმდინარე სეზონს რაც შეეხება, კვარაცხელიამ მონაწილეობა 12 შეხვედრაში მიიღო და მის ანგარიშზე 5 გოლი და 2 შედეგიანი გადაცემაა. Whoscored-მა ის მატჩის საუკეთესო ფეხბურთელად ორჯერ დაასახელა და „კვარას“ საშუალო შეფასება 7.23 გახლავთ.

როგორც მოგეხსენებათ, 12 ტურის შემდეგ, „ნაპოლი“ სერია A-ს სატურნირო ცხრილის ლიდერია. „პარტენოპეის“ 26 ქულა აქვს და „ფიორენტინას“, „ატალანტას“, „ინტერსა“ და „ლაციოს“ 1 ქულით უსწრებს. „ნაპოლი“ მომდევნო შეხვედრას 24 ნოემბერს გამართავს და „რომას“ დაუპირისპირდება.