მიქაუტაძის გაყიდვა დასჭირდებათ? - L’Equipe ლიონის ფინანსურ პრობლემებზე
საფრანგეთის ჩემპიონატის საკონტროლო-აღმასრულებელი დირექციის გადაწყვეტილებას, რომლის მიხედვითაც გიორგი მიქაუტაძის „ლიონს“ მსხვილი ფინანსური დავალიანების გამო სერიოზული სანქციები დაეკისრა და კლუბი შესაძლოა მიღწეული შედეგების მიუხედავად ლიგა 2-ში დაქვეითდეს, ფრანგული გამოცემა L’Equipe ეხმიანება.
გამოცემა წერს, რომ „ლიონს“ სატრანსფერო ფანჯრის დროს ახალი ფეხბურთელების ყიდვა აეკრძალა, თუმცა არანაირი სანქცია არ ვრცელდება ფეხბურთელების გაყიდვაზე, რაც დავალიანების გასასტუმრებლად ერთ-ერთი ყველაზე მარტივი გზა იქნებოდა. მეტიც, L’Equipe-ი აღნიშნავს, რომ ფინანსური სიტუაციის დასაბალანსებლად „ლიონს“ ზამთარში ფეხბურთელების გაყიდვა აუცილებლად მოუწევს.
„Transfermarkt-ის მიხედვით, ყველაზე ძვირადღირებული ფეხბურთელები რაიან ჩერკი და გიორგი მიქაუტაძე არიან, რომელთა სატრანსფერო ფასიც 20 მილიონი ევროა.
მიმდინარე სეზონში ჩერკის პროგრესი აქვს, 11 მატჩში მის ანგარიშზე 2 გოლი და 3 ასისტია. გუშინ მან საფრანგეთის ახალგაზრდულ ნაკრებში იტალიას გაუტანა.
რაც შეეხება მიქაუტაძეს, ის გუნდში მხოლოდ ზაფხულში მოვიდა, ამიტომ მისი გაყიდვა ნაკლებად სავარაუდოა, თუმცა „ლიონს“ ფული სჭირდება და თუ ქართველს კარგი მყიდველი გამოუჩნდა, ის პიერ საჟის გუნდს აუცილებლად დატოვებს.
შესაძლოა, კლუბმა რანგით მესამე ცენტრფორვარდი, ნიგერიელი გიფტ ორბანი გაყიდოს, რომელიც „გენტიდან“ 12 მილიონად იყიდეს, ახლა კი მისი ფასი 15 მილიონია. იმავეს თქმა შეიძლება ალჟირელ გარემარბ საიდ ბენრაჰმაზეც, რომელიც „ლიონმა“ ზაფხულში შეიძინა - მისი გაყიდვა სერიოზულად შეამსუბუქებს კლუბის სახელფასო უწყისს.
სხვა პოტენციურ წამსვლელებს შორის ასევე სახელდებიან ერნესტ ნუამაჰი (18 მლნ ევრო), მაქსანს კოკრე (18 მლნ ევრო) და მუსა ნიახატე (15 მლნ ევრო). გარდა ამისა ზაფხულში კონტრაქტი ეწურება მსოფლიო ჩემპიონ ნიკოლას ტალიაფიკოსაც, რომელმაც კარგი წინადადების შემთხვევაში შესაძლოა კლუბი უკვე ზამთარში დატოვოს“.
შეგახსენებთ, რომ „ლიონმა“ მიქაუტაძე გასულ ზაფხულს „მეციდან“ დაიმატა. ლიგა 1-ის სატურნირო ცხრილში „ლიონი“ ამჟამად 18 ქულით მეხუთე ადგილზეა.
რაც შეეხება მიქაუტაძეს, მის ანგარიშზე ამ სეზონში ყველა ტურნირზე ჩატარებულ 14 მატჩში 2 გოლი და 1 საგოლე გადაცემაა.
