„ოლიმპიური ჩემპიონი უნდა გამხდარიყო“ - ნაკრების ყოფილი მწვრთნელი ჭრიკიშვილზე

რამდენიმე კვირის წინ თურქეთის ძიუდოს ფედერაციის საპრეზიდენტო არჩევნები გაიმართა, სადაც მოქმედმა პრეზიდენტმა სეზერ ჰუისუზმა მთავარი კონკურენტი, 2000 წლის სიდნეის ოლიმპიური თამაშების ჩემპიონი ჰუსეინ ოზქანი დამაჯერებლად დაამარცხა. ჰუისუზის გამარჯვება ხელსაყრელი გახლდათ თურქეთის ნაკრების ქართველი მთავარი მწვრთნელისთვის ირაკლი უზნაძისთვის, რომელიც დიდი ალბათობით თანამდებობას შეინარჩუნებს.

თურქეთში წასვლამდე, უზნაძე ანალოგიურ პოზიციაზე საქართველოს ეროვნულ გუნდშიც მუშაობდა და შესაბამისად, Crystalsport-ისთვის მიცემულ ინტერვიუში მან არამხოლოდ თავის ამჟამინდელ საქმიანობაზე ისაუბრა, არამედ მისი მწვრთნელობის პერიოდშიც და ახლაც, ქართულ ძიუდოში მიმდინარე პროცესებზეც გაამახვილა ყურადღება.

ირაკლი უზნაძე

არჩევნებამდე რამდენიმე დღით ადრე ბევრი დაძაბულობასა და არეულობას წინასწარმეტყველებდა, მაგრამ ყრილობამ კონსტრუქციულ რეჟიმში ჩაიარა და მოქმედი პრეზიდენტი კიდევ ერთი, რიგით მესამე ვადით აირჩიეს. ჯერჯერობით არანაირი ხელშეკრულება არ გამიფორმებია, მაგრამ გვაქვს სიტყვიერი შეთანხმება და სავარაუდოდ დეკემბრის შუა რიცხვებში კონტრაქტსაც გავაფორმებთ.

რაც შეეხება ქართულ ძიუდოს, მსოფლიოში გამორჩეული პოზიცია უკავია და როგორც ყველამ კარგად იცის, რამის მოგებაზე უფრო ძნელი, მიღწეულის შენარჩუნებაა. ამიტომ, ქართველებს კიდევ უფრო მაღალ დონეზე გამოსვლა გვმართებს.

90 კილოგრამ წონით კატეგორიაში საქართველოს ნაკრებში საოცარი კონკურენციაა და ვიცი, რომ ერთი მათგანი ოლიმპიადის მიღმა უნდა დარჩეს, მაგრამ ალბათ, ნებისმიერი ქვეყანა ინატრებდა ერთ წონაში ორგზის ოლიმპიური ჩემპიონი და მსოფლიოს ჩემპიონი რომ ჰყავდეს. დარწმუნებული ვარ, მომდევნო ოთხ წელიწადში როგორც ლუკა მაისურაძე, ასევე ლაშა ბექაური მაქსიმუმს გააკეთებს და ლოს-ანჯელესში საუკეთესო წავა.

ჩემი მწვრთნელობის დროს აუცილებლად უნდა გამხდარიყო ოლიმპიური ჩემპიონი ავთანდილ ჭრიკიშვილი, რადგან მას საამისოდ ყველანაირი მონაცემები ჰქონდა. არამხოლოდ ჩემპიონი უნდა გამხდარიყო, არამედ ახლაც უნდა ეჭიდავა. უბრალოდ, მსოფლიოს ჩემპიონის ტიტულის მოგების შემდეგ, მან სავარჯიშო სტილი და მიდგომა შეცვალა, რასაც არ ვეთანხმებოდი, თუმცა რაც მოხდა, ვეღარ შევცვლით და ამას აღარაფერი ეშველება.

უზნაძე საქართველოს ძიუდოისტთა ნაკრებს 2013-2016 წლებში ავარჯიშებდა და მისი ხელმძღვანელობით რიო დე-ჟანეიროს ოლიმპიურ თამაშებზე ვარლამ ლიპარტელიანმა ვერცხლის, ხოლო ლაშა შავდათუაშვილი ბრინჯაოს პრიზიორი გახდა.