„VAR-მა პრობლემები ჯერ ვერ მოაგვარა...“ - დეკუ ლევანდოვსკის გაუქმებულ გოლზე

ბარსელონას სპორტულმა დირექტორმა, დეკუმ ლა ლიგის გასულ ტურში „სოსიედადთან“ მატჩში მომხდარ ინციდენტზე ისაუბრა და VAR-ის სისტემა გააკრიტიკა.

„ვფიქრობ, რომ VAR-მა ჯერ ვერ მოაგვარა პრობლემები, რომელთა მოსაგვარებლადაც ის იქმნებოდა. ახლა მხოლოდ „სოსიედადთან“ მატჩზე არ ვსაუბრობ. რაღაც ასპექტებში არის წინსვლა, მაგრამ ჯერ კიდევ არის გადაწყვეტილებები, რომლებსაც მსაჯები სუბიექტური ინტერპრეტაციების საფუძველზე იღებენ. „ანოეტაზე“ საკამათო გადაწყვეტილება ვიხილეთ, რომელიც, დიდი ალბათობით, მცდარი იყო.

ერთი რამ არ მესმის: თუ ეს სისტემა ნახევრად ავტომატურია და არაა სრულად ავტომატური, ესე იგი, ვიღაცამ ღილაკს უნდა დააჭიროს თითი. რატომ არის ის ნახევრად ავტომატური? არ მესმის, ჯერაც ვერ გავრკვეულვარ, ბუცები ყვითელი იყო თუ შავი... არ მინდა ამაზე დიდხანს საუბარი, იმიტომ რომ გამართლებებს არ ვეძებთ. თუ გადაწყვეტილება მცდარია, რომელ ეტაპზე იყო დაშვებული შეცდომა? თუ შეცდომა არ დაშვებულა, მაშინ აგვიხსნან ყველაფერი, იმიტომ რომ უკვე დავიბენით: რას ნიშნავს ნახევრად ავტომატური სისტემა? ახდენს თუ არა მასზე გავლენას ვიდეორეფერი, თუ მას არაფრის შეცვლა არ შეუძლია?“

დეკუს თქმით, ერთ კონკრეტულ მატჩში მომხდარ ინციდენტზე გაცილებით უფრო მნიშვნელოვანია ის, რომ სისტემა მთლიანად გაუმჯობესდეს.

„მე არ ვამბობ, რომ „ბარსელონამ“ „სოსიედადთან“ ამის გამო წააგო, მაგრამ ჩვენ სიტუაციაში გარკვევა გვსურს. ვფიქრობ, ფეხბურთისთვის და ლა ლიგისთვის კარგი იქნება, თუ მომავალში სხვა გუნდები ასეთი რამისგან დაზღვეულები იქნებიან“.

შეგახსენებთ, რომ ლა ლიგის გასულ ტურში მსაჯთა ბრიგადამ „სოსიედადის“ კარში რობერტ ლევანდოვსკის გოლი გააუქმა და თამაშგარე დააფიქსირა, თუმცა ვიდეოზე ჩანს, რომ კომპიუტერული გრაფიკა, რომლითაც VAR-მა პოლონელი თამაშგარეში დააფიქსირა, არასწორი იყო და რეალურ სტოპკადრს არ ემთხვეოდა.

„ბარსელონამ“ „სოსიედადთან“ 0:1 წააგო, მატჩის შემდეგ კი კატალონიურმა კლუბმა ლა ლიგისგან განმარტებები მოითხოვა. კლუბი არ დაკმაყოფილდა იმ ახსნა-განმარტებით, რომ რეპორტაჟისას ვიდეორეფერის არასწორი „სტოპ-კადრი“ მისცეს.