ვან ნისტელროი არ დარჩა - ნიდერლანდელი წაუგებელი წავიდა

დღეს რუბენ ამორიმი მანჩესტერში ჩავიდა და „იუნაიტედის“ მთავარი მწვრთნელის პოსტზე მუშაობას ხვალიდან შეუდგება. ერიკ ტენ ჰაგის წასვლის შემდეგ, რამდენიმე კვირის განმავლობაში მის მოვალეობას რუუდ ვან ნისტელროი ასრულებდა და 48 წლის ნიდერლანდელის ხელმძღვანელობით გამართული ოთხი მატჩიდან „წითელმა ეშმაკებმა“ სამი მოიგეს, ერთი კი ფრედ დაასრულეს.

კარგი შედეგებიდან გამომდინარე, ვან ნისტელროის დატოვებას „მანიუს“ ხელმძღვანელებს კლუბის დამსახურებული ვეტერანები ურჩევდნენ, მაგრამ როგორც ხედავთ არჩევანი ამორიმზე შეჩერდა, რომლის ხელშიც უკანასკნელი წლების მანძილზე „სპორტინგი“ უმაღლესი მიზნებისთვის მებრძოლ კლუბად ჩამოყალიბდა, თუმცა ეს არაფერს ნიშნავს, რადგან „ოლდ ტრაფორდზე“ რამდენიმე წლის წინ მიყვანილ ტენ ჰაგს იმაზე არანაკლები შედეგები ჰქონდა „აიაქსში“, ვიდრე ამორიმს ლისაბონურ კლუბში.

მისი მთავარი მწვრთნელობის გამორიცხვიდან გამომდინარე, იყო საუბრები ასისტენტად დატოვების თაობაზე და თავად რუუდიც აცხადებდა, რომ თუ სადმე თანაშემწედ მუშაობას დათანხმებოდა, ეს მხოლოდ „იუნაიტედი“ იყო, რადგან ეს გუნდი მისთვის ბევრს ნიშნავს, მაგრამ როგორც ჩანს ამორიმმა მთლიანად საკუთარი გუნდის მოყვანი განიზრახა და დღეს ვან ნისტელროიმ კლუბის წასვლის შესახებ განცხადება გააკეთა.

თერთმეტი ტურის შემდეგ თხუთმეტი ქულით „მანჩესტერ იუნაიტედი“ პრემიერ ლიგის სატურნირო ცხრილში მეცამეტე ადგილზეა. ამორიმის დებიუტი კი 24 ნოემბერს, „იფსვიჩ თაუნთან“ სტუმრად გასამართ მატჩში შედგება.