„სწორედ ილიამ შთამაგონა“ | კარლოს ალკარასმა თოფურია გამოარჩია

ცნობილმა ამერიკულმა ჟურნალმა, Vogue-მა მსოფლიოს საუკეთესო ჩოგბურთელები შეკრიბა (ნოვაკ ჯოკოვიჩი კოლეგებს ტრავმის გამო ვერ შეუერთდა) და მათთან ინტერვიუები ჩაწერა. Vogue-ის ერთ-ერთი შეკითხვა ჩოგბურთელთა შთაგონების წყაროსთან იყო დაკავშირებული და კარლოს ალკარასმა ილია თოფურია გამოარჩია.

Vogue: „არის ვინმე ან რამე საჩოგბურთო სამყაროს გარეთ, მაგალითად მომღერალი, ბენდი, მწერალი, პოეტი, ფსიქოლოგი ან ვინმე სხვა, ვინც 2024 წელს შთაგაგონათ?“

ალკარასი: „რთული შეკითხვაა, მაგრამ ჩემი შთაგონების წყაროდ ილია თოფურიას დავასახელებ. ელ მატადორმა ძალიან შთამაგონა“.

ცნობისთვის, 2024 წელს, ალკარასმა 4 ტურნირი მოიგო, რომელთაგან ორი დიდი სლემი გათამაშება იყო. ესპანელი ჩოგბურთელი „როლან გაროსისა“ და „უიმბლდონის“ გამარჯვებული გახდა. საერთო ჯამში, მან 63 შეხვედრა გამართა და 52-ჯერ იმარჯვა.

თოფურიას რაც შეეხება, 2024 წელს, ილიამ UFC-ის ქვემსუბუქი წონითი დივიზიონის საჩემპიონო ქამარი მოიპოვა და ალექსანდრ ვოლკანოვსკი დაანოკაუტა. რამდენიმე თვის შემდეგ, „ელ მატადორმა“ მაქს ჰოლოუეი დააფინიშა და ერთ წელიწადში „დალოცვილისა“ და „ვოლკის“ მსგავსი ლეგენდები დაამარცხა.