ბითაძის შოუ | ეფექტური ჩატენვები და ორმაგი დუბლი ვაშინგტონთან
გოგა ბითაძის „ორლანდო მეჯიქმა“ ზედიზედ მეორე თამაში მოიგო. „ნიუ ორლეან პელიკანსის“ დამარცხების შემდეგ, ქართველი ცენტრის გუნდი საკუთარ კედლებში „ვაშინგტონ უიზარდსს“ დაუპირისპირდა და მეტოქეს შანსი არ დაუტოვა - 121:94.
ბითაძემ მატჩი სასტარტო ხუთეულში დაიწყო და ბრწყინვალე შეხვედრა ჩაატარა. გოგამ პარკეტზე 21 წუთი და 39 წამი გაატარა და ორმაგი დუბლი გაიფორმა - 10 ქულა, 12 მოხსნა, 3 შედეგიანი გადაცემა, 1 დაფარება. ბითაძემ 6-დან 5 ორქულიანი გამოიყენა და მის პასივში მხოლოდ ერთი ჯარიმა იყო.
აღნიშვნის ღირსია ის, რომ გოგამ „ვაშინგტონის“ ფარზე ბურთი 6-ჯერ მოხსნა და ეფექტური ჩატენვები შემოგვთავაზა. „ორლანდოს“ მთავარ მექულეს რაც შეეხება, „მეჯიქის“ რიგებში საუკეთესო ფრანც ვაგნერი იყო - 23 ქულა, 7 პასი, 4 მოხსნა. მისმა ძმამ, მორიც ვაგნერმა 16 ქულა და 6 მოხსნა მიითვალა.
Goga Bitadze vs. WAS:
— Orlando Magic (@OrlandoMagic) November 11, 2024
10 PTS
12 REB
3 AST
83% FG
22 MIN https://t.co/ZBuNiJU5FR pic.twitter.com/eryW34hklX
ცნობისთვის, „ორლანდოს“ 5 მოგება და 6 წაგება აქვს. „მეჯიქი“ აღმოსავლეთ კონფერენციაში მე-4 გახლავთ და მომდევნო შეხვედრა 13 ნოემბერს, „შარლოთ ჰორნეთსის“ წინააღმდეგ ელის. გოგას გუნდი ამ მატჩშიც მასპინძლის სტატუსით იქნება.
