შენგელიას 16 ქულა - ვირტუსის მე-2 მოგება ევროლიგაში

„ვირტუსმა“ საკალათბურთო ევროლიგის მიმდინარე გათამაშებაში მე-2 გამარჯვება მოიპოვა. ბოლონიელებმა საკუთარ დარბაზში თელ-ავივის „მაკაბის“ უმასპინძლეს და მეტოქე 7-ქულიანი სხვაობით, 84:77 დაამარცხეს. მატჩის MVP სტუმართა ამერიკელი ლეგიონერი ლევი რენდოლფი (21 ქულა, 3 მოხსნა, 3 ასისტი) გახდა, გამარჯვებულებს შორის საუკეთესო კი თორნიკე შენგელია გახლდათ.

საქართველოს ნაკრების 33 წლის კაპიტანმა 24 წუთი ითამაშა და მატჩი 16 ქულასთან ერთად, 5 მოხსნითა და 2 შედეგიანი გადაცემით დაასრულა. თოკომ ექვსიდან ხუთი ორქულიანი და ოთხიდან ორი სამქულიანი ჩააგდო, საჯარიმოს ხაზთან კი არც ერთხელ არ დამდგარა. ხუთი მოხსნიდან შენგელიამ სამი დაცვაში, ორი კი შეტევაში თამაშისას შეასრულა, ბურთი 4-ჯერ დაკარგა, 1 ჩაჭრა ჰქონდა და 2 პერსონალური ჯარიმა მიიღო.

2 მოგებითა და 6 წაგებით „ვირტუსი“ სატურნირო ცხრილში მე-16 ადგილზეა. ევროლიგის მომდევნო ტურში შენგელია და მისი თანაგუნდელები 12 ნოემბერს სტუმრად მადრიდის „რეალთან“ ითამაშებენ, იქამდე კი 10 ნოემბერს იტალიის ჩემპიონატზე გასვლაზე „ვარეზეს“ შეხვდებიან.