„შერმადინი და მისი თანაგუნდელები სამაგალითოები არიან“ - ლეიმას მწვრთნელი ტენერიფეზე

კვირას, ესპანეთის საკალათბურთო ჩემპიონატის VII ტურში სპორტის ამ სახეობის ქართველი ქომაგების ყურადღება გალისიისკენ იქნება მიპყრობილი, სადაც ბექა ბურჯანაძის „ლეიმა“ გიორგი შერმადინის „ლა ლაგუნა ტენერიფეს“ უმასპინძლებს. მნიშვნელოვანი დაპირისპირების წინ, ლა კორუნიელების მწვრთნელმა დიეგო ეპიფანიომ მეტოქე გუნდის მისამართით კომპლიმენტები არ დაიშურა და ბუნებრივია შერმადინიც შეაქო, რომელიც წლებია კანარის კუნძულების კლუბის ლიდერი და გამორჩეული ბომბარდირია.

რას ამბობს შერმადინზე

პირადად ჩემთვის სამაგალითოა ის თამაში, რასაც „ლა ლაგუნა ტენერიფე“ უკანასკნელ წლებში როგორც ესპანეთის ჩემპიონატში, ასევე ჩემპიონთა ლიგის გათამაშებაში აჩვენებს. მათ განსაკუთრებული ბიუჯეტი არ აქვთ, მაგრამ მთავარი მწვრთნელის ჩუს ვიდორეტას კარგი ალღოს წყალობით მიაგნეს წარმატების იმ რეცეპტს, რომლითაც ყოველ სეზონში ხელშესახებ შედეგებს აჩვენებენ.

გამოვარჩევდი გიორგი შერმადინისა და მარსელინიო უერტასის შეთამაშების ხარისხს. ისინი პარკეტზე ერთმანეთს თვალდახუჭულნი უგებენ და ამ ტანდემის წყალობით კუნძულელებს უამრავი მნიშვნელოვანი მატჩი მოუგიათ.

ექვსი ტურის შემდეგ „ლა ლგუნა ტენერიფე“, რომელსაც მატჩით ნაკლები აქვს ჩატარებული, ოთხი მოგებითა და ერთი წაგებით მეხუთე ადგილზეა, „ლეიმას“ კი ორი მოგება და ოთხი წაგება აქვს მეთხუთმეტე პოზიციაზე იმყოფება.