„UFC-ის საუკეთესო მებრძოლია“ | ბო ნიკალი ილიას აქებს

UFC-ის საშუალო წონითი დივიზიონის მებრძოლმა, ბო ნიკალმა ილია თოფურიაზე ისაუბრა. ნიკალმა ხმამაღალი განცხადება გააკეთა და აღნიშნა, რომ მისი აზრით, „ელ მატადორი“ UFC-ის საუკეთესო მებრძოლია.

„მაქსი ძალიან მიყვარს, მაგრამ ვიცოდი, რომ ილია დაანოკაუტებდა. ჩემი აზრით, თოფურიამ პირველი ორი რაუნდი მოიგო, მაგრამ მეორე შედარებით თანაბარი იყო, ვიდრე პირველი. ჰოლოუეის მოუწია, უფრო გახსნილ სტილში ეჩხუბა და რისკზე წასულიყო, რადგან ილიას მაგარი დაცვა აქვს და სასურველ შედეგამდე მისვლა შეეძლო.

ვფიქრობ, ამ მომენტისთვის, თოფურია Pound for pound საუკეთესო მებრძოლია. ჯონ ჯონსი? მას არგუმენტები ნამდვილად აქვს, მაგრამ ვინ ანოკაუტებს ალექსანდრ ვოლკანოვსკის და მაქს ჰოლოუეის ზედიზედ? ისლამთან ჩხუბი? ილიას მახაჩევთან ბრძოლა უნდა და ვფიქრობ, შანსი ნამდვილად აქვს.

UFC-ის შიდა წყაროებიდან გავიგე, რომ თოფურიას მახაჩევი უნდა და მისი დამარცხების შემთხვევაში, ბელალ მუჰამედზე სურს გასვლა. სამი წონითი დივიზიონის ჩემპიონობა უნდა. რატომ მგონია, რომ ისლამთან კარგად იჩხუბებს? ვოლკისა და მახაჩევის პირველი ბრძოლა გახსოვთ? აი, ამიტომ მჯერა ილიასი. მას ვოლკანოვსკიზე ბევრად უკეთესი ჭიდაობა აქვს და ყველამ ვნახეთ, თოფურიას სტრაიკინგი რამდენად მაღალი დონისაა“.

ცნობისთვის, თოფურია Pound for pound რეიტინგში მე-4 პოზიციას იკავებს და მხოლოდ ისლამ მახაჩევს, ჯონ ჯონსსა და ალექს პერეირას ჩამორჩება.