Cadena SER: გუნდი მბაპეს ირგვლივ აშენდება, ვინისიუსი შესაძლოა გაიყიდოს
მადრიდში უკვე ალაპარაკდნენ, რომ ვინისიუსი-მბაპეს დუეტი ვერ მუშაობს და გუნდის საქმეები ცუდად მიდის. სეზონის სტარტის წინ კი მოლოდინები პოზიტიური იყო.
როგორც ცნობილია, კილიან მბაპე უახლოეს წლებში მადრიდის „რეალის" მთავარი ნაწილი იქნება და ახალი პროექტი სწორედ მის ირგვლივ აეწყობა.
Cadena SER-ი წერს, რომ კლუბის სპორტული პროექტი ფრანგი თავდამსხმელის ირგვლივ აშენდება და სამომავლოდ ვინისიუსის გაყიდვა გამორიცხული არ არის.
„შესაძლოა, რეალს გადაწყვეტილების მიღება მომავალ ზაფხულს მოუწიოს. ვნახოთ, რა მოხდება ვინისიუსთან დაკავშირებით. ორივე კარგი მოთამაშეა და ურთიერთგაგება უნდა იპოვონ, მაგრამ კლუბი ამჟამად შეშფოთებულია, რადგან გამოსავლის პოვნა ადვილი არ იქნება“,
- წერს ესპანური გამოცემა.
მბაპეს შესახებ უკვე არაერთხელ დაიწერა, რომ 9 ნომრის პოზიციაზე ის თავს კარგად ვერ გრძნობს და მარცხენა გარემარბად დაბრუნება სურს, სადაც ვინისიუსი თამაშობს.
როგორც ჩანს, „რეალს“ ყველაფრის გადაწყვეტა სეზონის ბოლოს მოუწევს და ბრაზილიელის გაყიდვა გამორიცხული სულაც არ არის.
