ცვლილება ჩემპიონ გუნდში - კრესპო გააგდეს

ერნან კრესპოს სამწვრთნელო კარიერა ჯერჯერობით ისევე წარმატებულად ვერ ვითარდება, როგორც მისი საფეხბურთო კარიერა გახლდათ. უკვე თითქმის მეათე წელია მან ხელი ამ საქმიანობას მოჰკიდა და ერთ სეზონზე მეტხანს ვერც ერთ კლუბში ვერ იმუშავა. 2023 წლის 14 ნოემბერს, ის მუშაობას არაბთა გაერთიანებული საამიროების ჩემპიონატში ოპტიმისტური განწყობით შეუდგა და დიდი იმედი ჰქონდა, რომ „ალ-აინი“ მისი ხელმძღვანელობით დასახული მიზნების მიღწევას შეძლებდა.

სამხრეთ ამერიკელისთვის თავდაპირველად ყველაფერი მართლაც ფენომენალურად წარიმართა და გუნდს აზიის ჩემპიონთა ლიგა მოაგებინა, თუმცა ბოლო პერიოდში მის მომზადებულ კლუბს ჩავარდნა დაეწყო და დღეს არგენტინელს პოსტი დაატოვებინეს.

გავრცელებული ინფორმაციის თანახმად, კლუბის ხელმძღვანელებს აზიის ჩემპიონთა ლიგაზე კრიშტიანუ რონალდუს „ალ-ნასრისთან“ (1:5) განცდილი მარცხის შემდეგ, კრესპოსთან სერიოზული უთანხმოება მოუვიდათ, რის გამოც მას კარისკენ მიუთითეს. სახარბიელო სიტუაცია „ალ-აინს“ არც შიდა ჩემპიონატში აქვს და მერვე ადგილს იკავებს.

არაბეთში წასვლამდე, ერნან კრესპო სხვადასხვა დროს დამრიგებლის პოზიციაზე „მოდენაში“, „ბანფილდში“, „სან-პაულუსა“ და „ალ-დუჰაილში“ მუშაობდა. „ალ-აინმა“ კი მისი ხელმძღვანელობით ჩატარებული 49 მატჩიდან 22 მოიგო, 7 ფრედ დაასრულა და 20-ში დამარცხდა.