„გუარდიოლას ნუ მადარებთ, ჩემზე გაცილებით უკეთესია“ - რუბენ ამორიმი

ლისაბონის „სპორტინგის“ მთავარმა მწვრთნელმა, რუბენ ამორიმმა, რომელიც რამდენიმე კვირაში „მანჩესტერ იუნაიტედს“ ოფიციალურად ჩაიბარებს, „მანჩესტერ სიტისთან“ გამარჯვებაზე ისაუბრა და პეპ გუარდიოლას მისამართით საქებარი სიტყვები არ დაიშურა.

რა თქვა ამორიმმა:

„ამ გამარჯვებით ძალიან ბედნიერი ვარ, მაგრამ პეპ გუარდიოლას ნუ მადარებთ. პეპი ჩემზე გაცილებით უკეთესია. მაგრამ ჩემი ახალი გუნდის მჯერა. ერთად მუშაობას მალე დავიწყებთ და მჯერა, რომ როგორც კლუბს, ისე გუნდს ერთად მუშაობით განვავითარებთ“.

„როდესაც „მანჩესტერ იუნაიტედში“ წავალ, მიდგომა განსხვავებული უნდა იყოს. „სპორტინგისგან“ ბევრს არაფერს ავიღებ, რადგან სხვანაირად თამაში მოგვიწევს. რა თქმა უნდა, ორივე გუნდი ისტორიულია, თუმცა, „იუნაიტედში“ განსხვავებული თამაში იქნება“.

შეგახსენებთ, რომ რუბენ ამორიმის დანიშვნის შესახებ „მანჩესტერ იუნაიტედმა“ ოფიციალურად რამდენიმე დღის წინ გამოაცხადა. პორტუგალიელი სპეციალისტი გუნდში ერიკ ტენ ჰაგს ჩაანაცვლებს. ამორიმი მანჩესტერულ კლუბს სანაკრებო პაუზის დროს შეუერთდება.