ბურჯანაძის შედეგიანი მატჩი - ლეიმა ბარსელონასთან დამარცხდა

ესპანეთის საკალათბურთო ჩემპიონატის VI ტურში „ლეიმა“ სტუმრად „ბარსელონასთან“ 26-ქულიანი სხვაობით, 80:106 დამარცხდა.  გალისიელებისთვის ყველაზე კარგი პირველი მეოთხედი გამოდგა, რომელიც 7-ქულიანი უპირატესობით მოიგეს, თუმცა შემდეგ ეს ჰანდიკაპი ვეღარ შეინარჩუნეს და სრულიად დამსახურებულად დამარცხდნენ.

„ლეიმას“ ქართველმა ლეგიონერმა ბექა ბურჯანაძემ 18:41 წუთში 12 ქულასთან ერთად, 7 მოხსნა და 2 შედეგიანი გადაცემა დააგროვა. აღსანიშნავია, რომ გალისიური კლუბის ქართველმა მოთამაშემ თორმეტივე ქულა საშუალო დისტანციიდან მიითვალა და ექვსიდან ექვსივე ორქულიანი გამოიყენა.

მოხსნების რაოდენობით კი ბურჯანაძე ორივე გუნდში საუკეთესო იყო - შვიდიდან ხუთ შემთხვევაში ბურთი დაცვაში, ხოლო ორჯერ შეტევაში ასპარეზობისას მოხსნა. გარდა ამისა, მას ერთი დაკარგვა ჰქონდა და ხუთი პერსონალური ჯარიმა მიიღო.

2 მოგებითა და 6 წაგებით „ლეიმა“ სატურნირო ცხრილში მეთოთხმეტე პოზიციაზეა. მომდევნო ტურში ბურჯანაძე და მისი თანაგუნდელები 10 ნოემბერს „ლა ლაგუნა ტენერიფეს“ უმასპინძლებენ, რომლის ღირსებასაც გიორგი შერმადინი იცავს.