ლიონი ლილს დაუზავდა, მიქაუტაძემ 13 წუთი ითამაშა

ლიგა 1-ის მე-10 ტურში გიორგი მიქაუტაძის „ლიონი“ „ლილს“ ესტუმრა - მატჩი ფრედ 1:1 დასრულდა. 

ანგარიში მე-17 წუთზე ჯონატან დევიდმა გახსნა, რომელმაც „ლიონის“ მცველების უხეში შეცდომით ისარგებლა, მეკარეს გვერდი აუარა და ბურთი ცარიელ კარში შეაგორა.

77-ე წუთზე აინსლი მეიტლენდ-ნაილსმა ანგარიში გაათანაბრა, თუმცა გოლი ვიდეორეფერიმ გააუქმა. მიუხედავად ამისა, „ლიონმა“ ლილიდან ქულის წამოღება მაინც შეძლო - მსაჯის მიერ კომპენსირებულ დროში ეფექტური გოლი მალიკ ფოფანამ გაიტანა.

რაც შეეხება გიორგი მიქაუტაძეს, ის მოედანზე 85-ე წუთზე გამოჩნდა, და მსაჯის მიერ კომპენსირებული დროის ჩათვლით 13 წუთი ითამაშა.

10 მატჩის შემდეგ „ლიონს“ 15 ქულა აქვს და მიქაუტაძის გუნდი ლიგა 1-ის სატურნირო ცხრილის მე-5 პოზიციაზეა. მომდევნო მატჩს „ლიონი“ 8 ნოემბერს ევროპა ლიგაზე, გასვლაზე, „ჰოფენჰაიმის“ წინააღმდეგ გამართავს.