სენსაცია თელავში - დილა იბერიას ჩამორჩა

გორის „დილასთვის“ Crystalbet ეროვნული საფეხბურთო ლიგის XXX ტური წარუმატებელი აღმოჩნდა. გორელებმა „კავკასიონი არენაზე“ ბოლოადგილოსან „თელავთან“  0:1 წააგეს, რომელიც ამ თამაშს 8-მატჩიანი მოუგებელი სერიით შეხვდა და ელიტაში ადგილის შენარჩუნებისთვის ბრძოლაში უმნიშვნელოვანესი 3 ქულა აიღო.

ერთადერთი გოლი მატჩის დასაწყისშივე გავიდა - ანდრე მენსალაოს მიერ მარჯვენა ფლანგზე განხორციელებული სოლო-რეიდის შემდეგ, ბურთი თორნიკე მორჩილაძეს მიუვიდა, რომელმაც უზუსტესი დარტყმით აიღო გორელების კარი.

სტუმრები ყველანაირად შეეცადნენ სიტუაციის გამოსწორებას, მათმა პორტუგალიელმა დამრიგებელმა ფრანსისკუ კაშტრუმ ბუღრიძისა და დრამეს გამოყვანით შეტევების გაძლიერებაც სცადა, მაგრამ არაფერი გამოუვიდათ და საბოლოოდ გორელებმა სტუმრად 13-მატჩიანი წაუგებელი სერია შეწყვიტეს, ხოლო ბერძენმა ხარალამბოს ხრისტოდულუმ „თელავის“ მთავარი მწვრთნელის პოსტზე სადებიუტო გამარჯვება მოიპოვა.

ცნობისათვის, მომდევნო, XXXI ტურში „დილა“ „ტორპედოს“ უმასპინძლებს, ხოლო „თელავი“ სტუმრად „დინამო ბათუმთან“ ითამაშებს.