ნამიბიის ეროვნული ნაკრების ფეხბურთელი თბილისის დინამოში ჩაირიცხა
საფეხბურთო კლუბ თბილისის „დინამოში’’ ნამიბიის ეროვნული ნაკრების საყრდენი ნახევარმცველი ტჯიპე კარუუმბე ჩაირიცხა. ინფორმაცია სამენეჯერო კომპანია Futuro Stars Agent Group-მა გაავრცელა. ფეხბურთელს აღნიშნული სააგენტო წარმოადგენს.
ფეხბურთელმა თბილისის „დინამო 2’’-ში სადებიუტო მატჩი 18 ოქტომბერს ჩაატარა, კრისტალბეთ ეროვნული ლიგა 2-ის 29-ე ტურში თბილისური გუნდი შინ ხობის „კოლხეთთან’’ 0:1 დამარცხდა. ნამიბიელი ფეხბურთელი სასტარტოში იყო, მეორე ტაიმში არ უთამაშია.
23 წლის ფეხბურთელმა ნამიბიის ეროვნულ ნაკრებში 4 მატჩი ჩაატარა, მის აქტივში 1 გოლია ლიბერიასთან.
ნამიბიური კლუბების გარდა 2022-23 წლების სეზონში ჩეხეთის რანგით მესამე ლიგაში ვლატინის „ლოკოში'' 1 მატჩი ჩაატარა, შემდეგ ნამიბიაში დაბრუნდა, ახლა კი თბილისურ კლუბში ჩაირიცხა.
