როი კინი: იუნაიტედს ვერ ვცნობ, იქ ვეღარ ვხედავ კარგ პიროვნებებსა და ფეხბურთელებს

ლეგენდარული ირლანდიელი ფეხბურთელი როი კინი უკმაყოფილოა იმით, რაც „მანჩესტერ იუნაიტედში“ ხდება.

„ევროპა ლიგაზე ტვენტესთან (1:1) მატჩის შემდეგ, ფეხბურთელები ამბობდნენ, რომ - „ალბათ მათ მოგება ჩვენზე მეტად უნდოდათ“. თუ, ასეთი რამ გასახდელში ისმის, გასაკვირი არ არის, რომ მწვრთნელს სიტუაციის კონტროლი უჭირს. აღარ არის გასაკვირი, რომ იუნაიტედი მატჩებს ვეღარ იგებს. გუნდი დაშლილი და დემორალიზებულია.

იუნაიტედს ყოველთვის ჰყავდა კარგი ხალხი და პიროვნებები, რომლებსაც კლუბში თამაში შეეძლოთ, მაგრამ ახლა ამას ვეღარ ვხედავ. მე არ ვიცნობ ამ გუნდს და არც კლუბს. ორიოდე თვის წინ თქვეს, რომ ახალი ხალხი ჰყავთ და ყველა პასუხს იპოვიანო. მათ რეკრუტირებაზე მეტი ფული დახარჯეს, მაგრამ საპირისპირო მიმართულებით წავიდნენ.

როდესაც იუნაიტედს განვიხილავთ, ეს უფრო ბიზნესს ჰგავს, მაგრამ ის საფეხბურთო კლუბია. საფეხბურთო კლუბი არის ადამიანები, რომლებიც მოდიან და წვლილი შეაქვთ. რასაც მე იუნაიტედში ვხედავ, შეიძლება ცოტა მკაცრი ვარ, მაგრამ დარწმუნებული არ ვარ, რომ იქ კარგი ფეხბურთელები და ადამიანები არიან, რომლებიც კლუბისთვის სწორ გადაწყვეტილებებს იღებენ“,

- თქვა „მანჩესტერ იუნაიტედის“ ყოფილმა ფეხბურთელმა SkyBet-ზე Stick to Football პოდკასტში.